«Ўзбекистон темир йўллари» йил бошидан буён 5 млн нафардан ортиқ йўловчини манзилига етказди

«Ўзбекистон темир йўллари» АЖ томонидан 2017 йилнинг I-чорагида 16,5 млн тонна юк ўз манзилига етказилди. Шунингдек, йўловчи ташиш ҳам ўтган йилнинг шу даврига нисбатан 152,1 минг йўловчига кўпайиб, жами 5,1 млн нафар йўловчи ўз манзилига етказиб қўйилди. 2 май  куни акциядорлик жамиятининг жорий йилнинг биринчи чораги якунларига бағишланган матбуот анжуманида бу ҳақда хабар берилди, деб ёзади Uz24.uz.

Маълум қилинишича, йил бошидан буён Маҳаллийлаштириш дастурига киритилган 46 та лойиҳа бўйича жами 12,91 млрд сўмлик маҳсулот ишлаб чиқарилди, бу эса режага нисбатан 106 фоизни ташкил этади. Аҳолига 110,5 млрд сўмлик хизмат кўрсатилди.

Ҳисобот даврида жами 196,1 млн АҚШ доллари миқдорида капитал маблағлар ўзлаштирилиб, давр прогнози 100 фоизга бажарилди. Хусусан, “Қарши-Термиз” темир йўл линиясини электрлаштириш, “Бухоро-Мискин” темир йўлини барпо этиш ишлари амалга оширилди.

Жорий йил биринчи чорагида юқори тезликда ҳаракатланувчи “Afrosiyob” замонавий электропоездлари сони яна 2 тага кўпайди. Ҳозирда “Afrosiyob” замонавий электропоездлари Самарқанд, Бухоро ва Қарши шаҳарларига ҳаракат жадвали бўйича ҳаракатланмоқда.

Шунингдек, “Ўзбекистон темир йўллари” АЖ томонидан Самарқанд шаҳрида трамвайлар ҳаракати йўлга қўйилди, пойтахтимизда Бўзсув канали устида ҳамда Бунёдкор ва Муқимий кўчалари кесишмасида кўприклар барпо этилди.