Ўзбекистонда тижорий авиация йўлга қўйилади

Ислом Каримов номидаги Тошкент Халқаро аэропортида “Ўзбекистон ҳаво йўллари” миллий авиакомпанияси ҳамда Arcos Jet ва Bombardier Business Aircraft компаниялари мутахассислари ўртасида учрашув бўлиб ўтди. Учрашувда ҳамкорлик истиқболлари муҳокама қилинди. Дастур доирасида Bombardier самолёти Тошкент осмони устида парвоз қилди.

 Ушбу ҳамкорлик Ўзбекистонда тижорий авиация ривожланишига туртки беради. Бу ҳақда илгари мамлакат президенти Шавкат Мирзиёев гапириб ўтган эди.

Bombardier Business Aircraft компаниясининг минтақавий вице-президентининг айтишича, мазкур ҳамкорлик ўзининг ижобий натижаларини узоқ куттирмайди. Айтилишича, мазкур компаниянинг асосий фаолияти самолётларни олиб-сотиш билан боғлиқ, бироқ улар бизнес-авиациянинг бошқа турларини, хусусан, лайнерларга хизмат кўрсатиш, экипаж аъзоларини тайёрлаш, лизинг, суғурта, молиялаш каби масалалар, самолётларни ижарага бериш каби ишларни ҳам ўзлаштириб олган.

Arcos Jet компаниясининг бошқарувчи партнёри Михаил Аленкин ўзбек авиалинияси минтақада ишбилармонлар авиациясининг барқарор ривожланишига хизмат қилишидан умидворлигини билдирди. “Биз ўзбек ҳамкасбларимизга ҳаво кемаларини етказиб бериш ва харид қилишдан тортиб, уларни эксплуатация қилиш ва тижорий юк ташишгача бўлган янги ва жуда фойдали имкониятлар тақдим этишга тайёрмиз. Биз ўз тажрибамизни ўзбек ҳамкорларимиз билан жон деб ўртоқлашишга тайёрмиз. Ўйлайманки, биргаликда ишлашимиз хорижий инвесторларга ва ўзбекистонлик бизнесменлар ўз маҳсулотини ташқи бозорларга олиб чиқиши ҳамда янги бизнес-шериклар топишида ёрдам беради”, деди Михаил Аленкин.

Хизмат учрашуви доирасида Bombardier самолётининг тақдимоти ўтказилди. Иштирокчилар унинг техник тавсифи ва авиацион имкониятлари билан танишди. Музокарадан сўнг Миллий авиакомпания ва бизнес-шерикларнинг ҳамкорликдаги фаолият режасини ишлаб чиқишга қарор қилинди.