Парижда янги Civic кўрсатилади
Францияда шу ойнинг охирида бўлиб ўтадиган моторшоуда Honda Civic хэтчбекининг премьераси ўтказилади.
Аввалроқ бу машина АҚШда намойиш этилган. Кўҳна қитъага эса энди етиб келди. Америкача ва европача версияларининг ташқи кўринишдан умуман фарқи йўқ.
Янги “Сивик”нинг ғилдираклар базаси эскисига қараганда 95 ммга ортган. Салони эса седанники каби, яъни ўзгаришсиз қолган.
Аммо европача русуми двигателдан ёлчиган. АҚШ русумига 1,5 литрли, 180 от кучига эга мотор ўрнатилган бўлса, европача русумда қўшимча 1 литрли (127 от кучи) бензинли ва 1,6 литрли (120 от кучи) дизелли версиялари ҳам бор.
Айтиб ўтиш керакки, МДҲда “Хонда”нинг бозори суст.