Пекин автошоусининг энг зўр йўлтанламаслари (фотолар)

Хитой автоҳаваскорлари ҳам йўлтанламасларга ишқибоз. Улкан гавдали, салобатли кроссовер кимга ёқмайди дейсиз? Қолаверса, ўз номи билан йўл танламайди, ўнқир-чўнқир йўллар азоби йўқ. Қуйида Хитой кўргазмасида намойиш этилган энг салобатли саккиз йўлтанламасни эътиборингизга ҳавола қиламиз.

BAIC BJ80 6x6

“Гелендваген” сотиб ололмаган бўлсангиз, куюнманг. Мана сизга хитойча “гелик”. Ҳатто эшигини ёпганда ҳам “немисча” товуш чиқади. Уддабурон хитойликлар ипидан игнасигача кўчиришган. 544 от кучига эга двигатель Хитойда топилмаганлиги боис, 250лигидан қўйилган.

USSV G.Patton GX

Калифорниянинг US Specialty Vehicles компанияси ўзининг тўпорича машинасини “дунёдаги энг улкан SUV” деб атамоқда. 375 от кучига эга баҳайбат йўлтанламаснинг узунлиги нақ олти метр.

JMC ва JAC T8

Хитой маркалари Америка автокорхоналаридан нусха кўчиришни эмас, такрорлашни ҳам ўзлаштирмоқда. Америкада бугун пикап чиқса, эртага унинг йўлтанламас версияси ҳам, албатта, ишлаб чиқарилади. Хўш, америкаликлар тайёрласа, хитойликлар қўл қовуштириб ўтирсинми? JMC инженерлари ясаган автомобиль кўринишидан ажойиб, бироқ унинг негизида оддий пикап ётибди.

Ford Everest

Американинг салобатли йўлтанламаси Ford Ranger пикапининг шассисида бунёд этилган бўлиб, 160-200 от кучи билан ҳаракатланади. Бу автомобилни ёқтирмайдиган киши йўқ деса бўлади.

JMC S350

JAC компанияси маҳсулотининг нафисроқ варианти.

Dongfeng CSK131A

Хитойнинг Mengshi (Warrior) деб номланган зирҳли вездеходини биринчи марта кўргазмада кўраётганимиз йўқ.  Пекинда унинг бир оз янгиланган варианти намойиш қилинди. Беш метрли “ҳарбий мошин” енгил ўқотар қуролдан узилган ўққа бардош беради. Унга ҳайдовчи билан бирга бешта десантчи сиғади.

BYD CCR

Ва ниҳоят спортча йўлтанламасга ҳам етиб келдик. BYD CCRнинг атрофини хавфсизлик каркаси ва бир қанча электроника ўраб турибди. У анчайин шиддатли, 4,9 сонияда юзга чиқади. Бежизга спортчиларбоп дейилмади.

USSV G.Patton XT

Калифорния автомобилсозларининг яна бир маҳсулотини кўргач, Jeep Wranglerни қайта қуриш орқали қандай автомобиль пайдо бўлишига жавоб оламиз. Гарчи эшиги иккитагина бўлса-да, қулайлиги, электрон анжомлари ва бошқа хусусиятларини тан олмасликнинг иложи йўқ. Муҳими тубининг ердан 35 см баландлиги унга ҳақиқий йўлтанламас қиёфасини беради.