Пойтахтда ҳафтада бир кун машина миниш тақиқланади

Экологик муаммолар кучаяётганлиги туфайли Мехико ҳукумати шахсий транспортдан фойдаланишга қатъий чеклов ўрнатди. Жорий йилнинг 5 апрелидан 30 июнигача Мексика пойтахтида шахсий автомобилларнинг ҳафтада бир кун юриши тақиқланади.

Мехикода аввалроқ бунга ўхшаш чекловлар эски автомобилларга нисбатан жорий этилган. Атроф-муҳит муҳофазаси бўйича комиссия раҳбари Мартин Лакайо айтишига қараганда энди машинанинг экологик кўрсаткичидан қатъи назар тақиқ барчага дахлдордир. Шахсий машинада ҳафтада 6 кун юриш мумкин.

Эслатиб ўтамиз: мартнинг ўрталарида Мехико ҳавосида озон миқдори ўта ошиб кетганлиги туфайли фавқулодда ҳолат эълон қилинган.

Экологик аҳвол ёмонлашганлиги сабабли қатъий чора қўллаш тажрибаси бошқа мамлакатларда учрайди. Декабр охирида Милан шаҳридаги экологик муаммо ва йўлдаги тиқинлар сабаб вақтинча тақиқ жорий этилган эди.