Қамчиқ довонида бўрон туфайли ҳаракатланиш оғирлашишидан огоҳлантирилди

Ўзбекистон Республикаси Фавқулодда вазиятлар вазирлиги Қамчиқ довонида об-ҳаво шароити оғирлашишидан огоҳлантирди. Вазирлик 19-21 ноябрь кунлари ҳудудда ноқулай об-ҳаво шароити ҳукм суриши кутилаётгани ҳақида фуқароларга SMS-билдиришномалар юбормоқда, деб Kun.uz ёзмоқда.

«19—21 ноябрь кунлари А-373 автомобиль йўлининг Қамчиқ довонидан ўтган қисмида қор ёғиши, вақти-вақти билан қорнинг кучайиши кутилмоқда. Кўриш даражаси 50—100 метргача ёмонлашади. Шамолнинг тезлиги сониясига 20—25 метрни ташкил этади», — дейилади вазирликнинг SMS-билдиришномасида.

Қайд этилган кунларда Қамчиқ довонида ҳаво ҳарорати пасайиб, музлаш рўй бериши мумкин.

Ҳайдовчилардан ушбу ҳудудда ҳаракатланишда эҳтиёт бўлиш сўралган.