“Қани, битта куҳ, денг”. Тошкент инспекторлари алкотестерлар билан юради

Тошкент шаҳри Йўл ҳаракат хавфсизлиги бошқармаси ходимларига алкотестерлар тарқатилади, деб ёзмоқда “Новости Узбекистана” портали. Бу тадбирдан мақсад мамлакат президентининг “Ҳуқуқбузарликлар профилактикаси ва жиноятчиликка қарши курашиш” тўғрисидаги қарори ижросини таъминлашдир.

Бир ой ичида Соғлиқни сақлаш вазирлиги, Бош прокуратура, Олий суд ва Ички ишлар вазирлиги йўл ҳаракати қатнашчилари алкогол ичганлигини аниқлашнинг соддалаштирилган тартибини ишлаб чиқиши зарурдир. Бу кунгача инспекторлар жойнинг ўзида экспертиза ўтказиши ва алкотестер ишлатишининг имкони бўлмаган. Улар фақат ҳайдовчидан наркодиспансер ёки руҳий-асаб касалликлари шифохонасига боришни сўрай оларди.

Апрел ойида Ўзбекистонда 2018-2022 йилларга мўлжалланган йўл ҳаракати хавфсизлиги Концепцияси лойиҳаси тақдим этилди. Ҳукумат жарималарни қатъийлаштирди, автомобилларга видеорегистраторлар ўрнатила бошланди. Бундан ташқари сентябргача болалар боғчаларида йўл ҳаракати қоидаларини махсус ўқитиш тизими амалга киритилади.