Қайси рангдаги машина дунёда кўп тарқалган?

Германиянинг BASF Coatings ширкати (BASF концернининг лок-бўёқ бўлинмаси) тадқиқотига кўра, Европа мамлакатларида оқ рангли автомобиллар кенг тарқалган. Янги машина харид қилаётганларнинг 29 фоизи оқ рангли автомобилни танлаган. Кулранг автомобиль ишқибозлари 18, кумуш рангдагисининг мухлислари 12 фоизлиги аниқланди.

Американинг PPG Industries, Inc. компанияси ҳам юқоридаги маълумотни тасдиқловчи натижалар олди. Ўрганилганларнинг 31 фоизи оқ, 18 фоизи қора ва 16 фоизи кулранг автомобилларни афзал кўриши аниқланди.

2016 йилда автомобилларнинг 78 фоизи оқ, қора, кулранг ва кумуш рангида бўяб чиқарилган. Ёрқин ранглар орасида кўк рангни танлаганлар кўп бўлди – 10 фоиз (2015 йилда 9 фоиз эди). Қизил ва жигарранг автомобиль мухлислари мос ҳолда 6 ва 4 фоизни ташкил этди. Сарғиш, зангори, тўқ сариқ, тилларанг, бинафша ва сариқ тусдаги автомобилга қизиқувчилар салмоғи бир фоизга бормайди.

Оқ рангли автомобиллар бутун дунё бўйлаб кенг тарқалган, хусусан Осиё-Тинч океани мамлакатларига тегишли маълумотлар шундан далолат бермоқда. Жанубий Америкадан ташқари бутун дунёда кўплиги бўйича иккинчи ўринда қора рангли машина туради, Жанубий Америкаликлар эса қоранинг ўрнига кумушрангни маъқул кўради. Қизил ранг Шимолий ва Жанубий Америкада кўп тарқалган, европаликлар кўк рангли автомобиль минишга ишқибоз.

Кузатувлар қизиқ бир ҳолатни кўрсатди. Ўн йил илгари ҳамма металл рангли машинани излаган. Аммо сўнгги йилларда металл рангига қизиқиш сўнди. Лок-бўёқ ишлаб чиқарувчи фирмалар янги технологиялар юзага келганини бунга сабаб қилиб кўрсатмоқда.

BASF Coatings спортча русумларнинг рангига ҳам эътиборини қаратди. Европадаги кабриолет ва спорткарларнинг тўртдан бири кулранглидир. Яна чораги оқ рангда. Шунингдек, қора рангли спорткарлар ҳам кўп. Кроссоверларнинг ҳам кўпчилиги оқ рангда.

Европада компакт синфдаги автомобилларни кўп учратиш мумкин ва улар ҳам ранг борасида бозордаги умумий тенденцияга мос тушади. Аксарияти оқ, қора ва кулранг бўлса, тўртинчи ўринда кумушранг, бешинчида кўк рангли машина кўп тарқалган.

Хўш, субкомпакт, яъни ўта ихчам машиналар қандай рангда бўялган? Маълум бўлишича, уларнинг ҳам учдан бири оқ ранглидир. Аммо қора рангдагисини учратиш маҳол, уларнинг сони жуда кам. Субкомпакт автомобилларни асосан ёшлар мингани сабабли омихта, қурама ранглисини танлайди.

Ва ниҳоят, бизнес синф машиналарига тўхталамиз. Сезганингиздек, бизнесменлар кўпроқ қора рангли машинада юради. Ёрқин рангли машиналар эса бизнес синфда кам учрайди. Дарвоқе, бу синфда зангори рангли машиналар ҳиссаси 3 фоизга тенг. Бошқа ҳеч қайси сегментда зангори ранг бунчалик кўп эмас.