Ravon Matiz Россияда энг арзон автомобиллар рейтингидаги биринчи ўрнини сақлаб қолди

«Российская газета» нашри 2015 йилнинг ноябрь ойида Россиядаги энг арзон автомобиллар ўнталигини тузиб чиқди. 20 октябрдан 20 ноябргача бўлган муддатда Россияда автокомпанияларнинг фақатгина 20таси автомобиллар нархини ўзгаришсиз қолдирди. «Автостат» таҳлилий агентлиги маълумотларига кўра, асосий ишлаб чиқарувчилар бир ёки бир нечта модель нархини оширди. Тўртта бренд — Geely, Lifan, Mercedes-Benz ва Toyota эса аксинча, айрим жамланмалар нархини тушириш эвазига моделлар баҳосини арзонлатди. Infiniti, Peugeot, Porsche, Mitsubishi, AвтоВАЗ компаниялари автомобилларига оид барча савдо рақамларига ўзгартишлар киритди.

Шундай қилиб, Россиядаги энг арзон автомобиллар рўйхатининг биринчи поғонасини Ravon Matiz мустаҳкам эгаллади. Мазкур модель ҳозирча Россияда эски Daewoo бренди остида савдога чиқарилмоқда. Айни пайтда Ravon Matiz Россияда 314 минг рублга сотилмоқда.

Lifan Smily ихчам хэтчбеки иккинчи ўриндан жой олди. Standart жамланмаси билан мазкур автомобиль 319 900 рублга баҳоланган. Машина ташқи томондан британиянинг Mini Cooper`ини эслатиб, 1,3 литрли 89 от кучига эга мотор, беш босқичли механик тезлик узатмалар қутиси билан таъминланган. Шунингдек, унинг олд ойналари автомат тарзда кўтарилиб, орқа томонни кўрсатишга мўлжалланган ойна қиздирилади. Жамланмадан иккита хавфсизлик ёстиғи ва туманга қарши чироқлар ҳам ўрин олган.

Энг арзон автомобиллар учлигини седан кузовидаги Lada Granta модели якунлаб берди. Мазкур машина сўнгги ойда 8 минг рублга қимматлади ва  348 минг рублдан сотилмоқда. Аввалги рейтингда учинчи ўринни банд этган Lada Granta лифтбеки 368500 рублга баҳоланиб, биратўла бешинчи поғонага тушди.

Олтинчи ўринни яна бир Lifan модели – Solano эгаллади. У 379900 рублга сотилаётган бўлса, рейтингнинг кейинги ўринларини Geely GC6 (389 000 рубль), Chery Bonus (389 999), Datsun on-DO (391 000) ҳамда Renault Sandero (399 000) хэтчбэки қайд этилди.

Бу сафар Chery Veryва Lada Kalina биринчи ўнталикни тарк этишди. Хитой маҳсулоти деярли 400 минг рублга баҳоланган бўлса, “АвтоВАЗ” хэтчбэки 20 минг рубллик чегирмаси билан 411 мингдан таклиф қилинмоқда.

Маълумотларга кўра, ноябрь ойида Ravon Matiz ситикарининг янги авлоди Россияда 2016 йилнинг март-апрель ойидан савдога чиқарилади. Шу билан бирга, Россия топ-10 рейтингига 379 минг рублдан бошланадиган Ravon Nexia автомобилининг киритилиши ҳам кутилмоқда.