Renault Alaskan 2017 серияли пикапи расман тақдим этилди

Саноқсиз шов-шувли анонслардан сўнг французларнинг Renault компанияси янги Alaskan серияли пикапи юзидан пардани кўтарди. Тақдимот маросими 30 июнь куни бўлиб ўтди. Бир тоннали пикап Nissan NP300 Navara янги авлодининг базасига қурилган.

Renault Alaskan 2015 йилда тақдим этилган шу номли концептдан деярли фарқ қилмайди. Радиатор панжараси кенг-мўл ишланган, Renault логотипи жойлаштирилган. Капот гўё мушаклари бўртиб тургандек чизиқларга эга. Кундузги чироқлари С ҳарфи шаклида. Салмоқли қуйма дисклари бор. Туби йўлдан бирмунча юқори, аниқроғи 23 см баландликда.

Пикапга 2,3 литрли твин-турбо дизел двигатели ўрнатилган. Биринчи варианти 160 от кучига эга бўлса, иккинчиси 190 от кучига эга. Бундан ташқари айрим бозорларда мотори 2,5 литрли версияси ҳам сотилади. 6 поғонали механик ёки 7 поғонали автоматик қути билан ишлайди. 4×4 тўла узатмали тизим билан жиҳозланади.

Қудратли пикап 3,5 тоннали тиркамани судрай олади. Салонда 5 дюймли рангли TFT дисплей, иқлим назоратчиси, навигация ва мултимедиа (7 дюймли дисплейга эга) ҳамда 360 градус теваракни кўриш тизими мавжуд.

Renault Alaskan пикапини сотиш 2016 йил охиригача Колумбияда бошланади. Ундан ташқари бир қанча Жанубий Америка мамлакатлари бозорларига олиб кириш мўлжалланган. Европада ҳам кейинчалик сотилади. Мексика, Испания ва Аргентинада ялпи ишлаб чиқариш режалаштириляпти.