Renault’нинг пикапи 2016 йилдаёқ бозорга чиқади

Renault-Nissan альянси ичидаги техник алоқалар борган сари мустаҳкамланмоқда ва бу ҳамкорликнинг навбатдаги маҳсулини 2016 йилда бозорга чиқарилиши кутилаётган пикап мисолида кўриш мумкин, деб ёзади “За рулём”.

Май ойи бошида бўлиб ўтган Renault акциядорларининг ёпиқ мажлисидан тақдимот слайдлари сизиб чиққан бўлиб, унда, хусусан, 2016 йилда чиқариладиган янги автомобиллар орасида пикап ҳам борлиги билдирилган.

Жорий ҳафтада эса мазкур маълумотни Renault’нинг Австралиядаги бўлинмаси топ-менежерларидан бири билвосита тасдиқлади – автомобиль тез орада бозорга чиқади ва у Nissan NP300 Navara’га ўхшаб кетади.

Француз пикапининг ташқи кўриниши борасида ҳеч қандай янгилик йўқ – у, катта эҳтимол билан, 2015 йилнинг кузида намойиш этилган Alaskan концептини кўп жиҳатдан такрорлайди. Бироқ интерьер масаласида аниқ маълумотлар йўқ.

Бундан ташқари, сериялаб ишлаб чиқариладиган янги пикап Alaskan номини оладими ёки унга бошқа ном бериладими – буниси ҳам номаълум.