Ривожланаётган мамлакатларда ҳам дизель тақиқланади

Ривожланаётган давлатлар орасида дизель автомобилларини сотиб олишга тақиқ қўйган биринчи мамлакат Ҳиндистон бўлиши мумкин.

Ҳиндистоннинг Олий суди якка шахсларнинг дизель автомобиллари олишига тақиқ қўйиш тўғрисидаги арзномани кўриб чиқмоқда. Бундай талаб билан Ҳиндистоннинг “яшил” суди (National Green Tribunal, NGT) чиқди.

Бу ташаббусга сабаб Ҳиндистонда экологик вазиятнинг ёмон аҳволда эканлигидир. Муассаса вакиллари ахборотига кўра, ҳавонинг ифлосланиши туфайли ҳар йили Ҳиндистонда 600 минг киши дунёдан кўз юмади. Шу сабабли вазият тезкор чора кўришни тақозо қилади. Экологик муассаса Деҳлида дизель автомобилларни қайддан ўтказишни вақтинча тақиқлашга эришди. NGTнинг галдаги мақсади бутун Ҳиндистон бўйлаб дизель автоларини тақиқлашга эришишдир.

“Яшил” суд ҳукуматнинг Деҳлида амалга киритган “жуфт-тоқ” тизимини танқид қилиб келмоқда. Бу тартибга кўра машинанинг шаҳар марказига кириши ҳафта куни ва автомобиль номерининг охирги рақамига боғлиқ. NGT бу самарасиз ва фуқароларни иккита автомобиль сотиб олишга ундайдиган қарор, деб ҳисоблайди.

Эслатиб ўтамиз, дизель автомобилларига чеклов ўрнатишга бел боғлаган фақат ҳиндлар эмас. Германия, Буюк Британия ва яна 3 тараққий этган давлат 2050 йилга бориб дизель ва бензинли автомобилларни бутунлай тақиқлашга эришмоқчи. Тўғри, гибрид моторларга бунинг дахли йўқ.