Россияда Хитойнинг FAW маркасидаги кроссоверлар тайёрланиши мумкин

Хитой автосаноати йилдан-йилга жаҳон автомобиль бозоридаги улушини ошириб бормоқда. Хитойлик ишлаб чиқарувчиларнинг моделлари яхши сифатга эга, энг муҳими, уларнинг нархи бошқа маркаларга қараганда арзонроқ.

Хитойнинг йирик автомобиль ишлаб чиқарувчиларидан бири бўлган FAW концерни Россия ҳудудида X80 ва D60 маркасидаги иккита кроссоверни тайёрлашни режалаштирмоқда.

“FAW компанияси Россия Федерациясида ўзининг SUV сегментидаги X80 ва D60 кроссоверларини ишлаб чиқаради. Бундай ёндашув компания харажатларини камайтиради ва мижозларга тақдим этиладиган автомобилларнинг нархини янада туширишга ёрдам беради”,-дейилади компания баёнотида.

Ушбу иккита кроссовер “Автотор” заводида тайёрланиши кўзда тутилган. Норасмий маълумотларга қараганда, X80 ва D60’нинг илк партияси ушбу корхонанинг Калининграддаги заводида ишлаб чиқарилган.

X80 кроссовери 2 ёки 2,3 литрли 142 та (ёки 160) от кучига эга двигатель билан таъминланади.  D60 эса ўрта қувватли автомобиль бўлиб, унга 1,5 литрли 102 та от кучига эга мотор ўрнатилади.

Россия бозори учун мўлжалланган FAW кроссоверларининг тақдимоти Москва-2016 автосалонида бўлиб ўтиши кутилмоқда. Мазкур кўргазманинг очилишига бир неча кун қолди, холос.