Самолётда нималар ташилмаган дейсиз?

Самолётларда ташиладиган юкларни вазни, ўлчам ва бошқа кўрсаткичларига кўра ўз категорияси бўлади. Аммо баъзида ҳеч қандай қолипга сиғмайдиган юклар учрайди. Бугун шунақа юклар хусусида бир шингил..

Косатка кити

Американинг “Виллини озод қилинг” филми қаҳрамони Косатка кити икки марта самолётда учган. Уни, дастлаб, Мехикодан Орогенга C-130 Hercules самолётида олиб келишган бўлса, сўнг Boeing C-17 Globemaster III самолётида Исландияга элтиб қўйишган. Кейинроқ кит денгизга қўйиб юборилган.

Офталмологик клиника

Orbis International нотижорат ташкилоти McDonnell Douglas DC-10 самолёти базасида “учар госпитал” ясаган. Тўлақонли офталмологик клиника ўзининг халқаро шифокорлар жамоаси билан ривожланаётган мамлакатларга бориб, кўз касалликларини даволайди.

Сигирлар

Ҳожибой Тожибоевнинг самолётга юкланаётган сигирлари ва “Маша”си эсингиздами? Ҳа, баъзида қорамолларни ҳам иззат-икром кўрсатиб самолётда ташишади. 390 сигир Boeing 747 самолётида Ирланд денгизи устидан учиб ўтган. Сигирларнинг танасидан чиққан иссиқлик сабаб самолёт датчиклари ёнғин тревогасини кўтариб юборган.

V-22 Osprey конвертоплани

Самолёт ва вертолёт имкониятларини ўзида жамлаган V-22 Osprey конвертоплани кичкина нарса эмас, аммо Aero Spacelines Super Guppy юк ташувчи самолётига осонгина жойлашган.

Итлар озуқасига таъм берувчи қўшимчалар

Ўзи ит бўлса, овқатига таъм бериш учун шунча транспорт ва учувчи оворами, деб савол берманг. Францияга 90 тонна шундай юк Boeing 747 самолётида ташиб борилган. Арзанда ҳайвонларнинг емиши самолётнинг бутун бошли юк бўлмасини эгаллаган.

C-130 фюзеляжи

C-130 Hercules самолётининг фюзеляжини кўп юк кўтарадиган Lockheed C-5 Galaxy С-5 ҳарбий-транспорт самолётида ташиш учун лойиҳалаштириш ва синаш ишларига икки йил кетган.

Париж-Дакарнинг барча юклари

2000 йилда ўтказиладиган машҳур раллига нотинч Нигернинг партизанлари хавф соларди. Шунинг учун Париж-Дакар раллисига тегишли одамлардан тортиб автомобилларгача, нимаики бўлса, бари самолётда Ливияга олиб борилган. Пойга Қаддофийнинг мамлакатида янгитдан бошланган. Ташиш учун Ан-124 “Руслан” самолёти 18 марта қатнаган. Бу ишларга 5 млн доллар сарфланган.

Улкан лазер

Boeing YAL-1 тажрибавий самолёти тумшуқ қисмида ракеталарни йўқ қилувчи улкан лазер замбаракни олиб кетган. Тўғри, синовдан сўнг бу лойиҳа ёпилган.

Ядро реактори

Бортида ядро реакторини жойлаган Convair NB-36H самолёти 1955 йилда ясалган ва синаб кўрилган. Кейинроқ 1961 йилда ССРИ ҳам Ту-119 самолётини ясаган ва ядро реактори билан жиҳозланган. 60-йилларнинг ўрталарига бориб иккала улкан давлат “учар атом”дан воз кечиб, лойиҳаларини ёпган.

190 тоннали генератор

Ан-225 “Мрия” ўзи энг оғир транспорт самолёти саналади, бунинг устига 2013 йилда Цюрихдан Баҳрайнга вазни 190 тоннали генераторни олиб борган. Бу ҳавода ташилган юклар орасида энг салмоқлиси ҳисобланади.