Саноқли нусхада қолган дунёнинг энг қиммат автомобиллари (фото)

Жаҳон бўйлаб бир йилда бир неча маротаба ўтказиладиган автомобиль аукционларида ноёб ва жуда қиммат автомобиллар савдога қўйилади. Дунёда шундай автомобиллар борки, улар нафақат ноёб балки ўзига хослиги билан ҳам ажралиб туради. Масалан, бундай ўзига хослар қаторига камёб машиналарни киритиш мумкин. Daryo.uz нашри эса дунёдаги кам нусхадаги энг қиммат автомобилларнинг 6 талик рейтингини тақдим қилди.

Rolls-Royce 15 hp: 35 миллион доллар

Бу дунёдаги энг қиммат ва камёб автомобиллардан бири. Rolls-Royce 15 hp – Чарльз Роллс ва Генри Ройс томонидан Манчестерда 1904 йилда йиғилган биринчи модель ҳисобланади. Ҳаммаси бўлиб олтита шундай машина йиғилган. Маълум бўлишича, бугунги кунгача улардан биттаси сақланиб қолган. Машинага уч цилиндрли 15 от кучига эга двигатель ўрнатилган ва энг юқори тезлиги 63 км/соат бўлган. Автомобиль баъзан музей ва автосалонларда намойиш қилинади. Автомобиль суғурта компаниялари томонидан 35 миллион доллар миқдорида баҳоланган.

Leyat Helica: 20 миллион доллар

Француз машинасози Марсель Лейя томонидан ХХ асрнинг бошида яратилган пропеллерли автомобилни бугун ҳам учратиш мумкин. Автомобильнинг жами 30 та нусхаси яратилган. Сақланиб қолган нусхаларнинг барчаси хусусий коллекцияларда ва савдога камдан-кам қўйилади. Унинг нархи 20 миллион доллар миқдорида баҳоланган.

Ferrari 250 GTO: 52 миллион доллар

Дунёдаги энг қиммат саналадиган бу автомобиль 52 миллион доллар туради. Бироқ у дунёдаги энг камёб автомобиль эмас. Қизиқарли томони шундаки, коллекционер автомобилни унинг аввалги эгасидан хусусий тартибда сотиб олган. Нархи жиҳатидан дунёда иккинчи ўринда турадиган автомобиль ҳам Ferrari 250 GTO. Кимошди савдоларнинг бирида машина 38 миллион 115 минг долларга сотилган. Бу ишлаб чиқарилган 39 та автомобильнинг ҳисоб бўйича 19-сидир. Машинанинг собиқ эгалари Формула-1 иштирокчилари Жо Шлессер ва Эрнесто Прино, шунингдек олимпиада чемпиони Анри Орилье бўлган.

Aston Martin Bulldog: 1,3 миллион доллар

Ушбу ноодатий автомобиль ягона нусхада ишлаб чиқарилган. 1979 йилда йиғилган автомобилнинг узунлиги 4,5 метр, баландлиги эса бир метрдан сал баландроқ. Автомобильни кам нусхада ишлаб чиқариш режалаштирилган, бироқ режа амалга ошмаган.

Машина 600 от кучига эга 5,3 твин-турбо двигатели билан жиҳозланган. Буюк Британияда йиғилган автомобилнинг ўзига хослигини «Балиқчи қуш қанотли» эшиклар, электрон ускуналар панели, орқа томонни кўрсатувчи камера ва чап томонда жойлашган рул кўрсатиб туради. 1980 йилда “Bulldog”ни америкалик коллекционер 130 минг долларга сотиб олган. 2011 йилда британиялик бойвачча «Астон» учун 1,3 миллион доллар тўлайди.

Jaguar XKSS: 30 миллион доллар

Бу автомобиль «дунёдаги биринчи суперкар» деб аталади. Автомобиль 1957 йилда яратилган ва «Ле-Ман» кубогининг уч карра ғолиби D-Type пойгачи автомобилининг оддий йўлда юрадиган варианти сифатида яратилган. Ҳаммаси бўлиб 25 та машинани сотувга чиқариш режалаштирилган, бироқ Ковентридаги заводда юз берган ёнғин натижасида автомобилларнинг тўққизтаси ёниб кетган. Қолганлари эса сотилган.

Автомобильни сотиб олган харидорлардан бири машҳур актёр Стив Маккуин бўлиб, у Jaguar’ни беш минг долларга сотиб олган. 2014 йилда автомобилни сотиб олган коллекционер машина учун 30 миллион доллар тўлаган.

Ferrari F50 GT: 2,9 миллион доллар

F50 оддий суперкарининг пойга варианти уч нусхада ишлаб чиқарилган. Машина пойгаларда қатнашиши керак бўлган, бироқ лойиҳа бекор қилинган. 4,7 литр сиғимли V12 двигатель билан жиҳозланган, 750 от кучига эга бўлган учала автомобиль ҳам сотилган. 2013 йилда Ferrari F50 GT 2,9 миллион долларга баҳоланган.