Швециядаги “ақлли чуқурлар” – қоидабузарларни жазолашнинг янги усули

Швециянинг Edeva компанияси ажойиб йўл технологиясини ишлаб чиқди. Ушбу технология тезликни оширадиган ҳайдовчиларни яхшигина таъзирини беришга мўлжалланган. Actibump технологияси йўлнинг маълум қисмларига ўрнатиладиган ва электронлаштирилган плитадан иборат. Қурилманинг асосий хусусияти шундаки, у йўл қоидаси ва белгиланган тезлик меъёрларига риоя қиладиган ҳайдовчиларни умуман безовта қилмайди. Аниқроқ қилиб айтадиган бўлсак, йўлда ҳаракатланиб келаётган транспорт воситаси агар ўрнатилган тезликка амал қилса, плита жойидан қўзғалмайди. Бироқ ҳайдовчи тезликни оширадиган бўлса, плитанинг бир томони пастга қараб оға бошлайди, натижада қоидабузар автомобиль суньий чуқурга тушиб зарарланади.

Автомобиль тезлиги, асосан, радар ёрдамида ўлчанади, бироқ камера ва индукцион шарнирли вариантлар ҳам кўзда тутилган. Тизимни, шунингдек, дистанцион пульт ёрдамида ҳам бошқариш мумкин. Масалан, тез тиббий ёрдам ёки бошқа хизмат уловлари ўтганда тизимни фаолсизлантириш учун пульт жуда қўл келади.

Концепт муаллифларининг фикрича, мазкур технология экологик жиҳатдан тоза, шунингдек, у қоидага амал қиладиган ҳайдовчиларни умуман безовта қилмайди. Ақлли чуқурлар айни пайтда Швециянинг баъзи шаҳарларида (Уппсаль, Линчепинг) ва Оресунд кўпригида ўрнатилган.