Швейцарияда илк “боғча”ли автомобиль тайёрланди

Швейцариянинг Rinspeed компанияси ноодатий концептлари билан ном таратган. Масалан, Oasis электромобилини олайлик. Унда ҳақиқий ўсимлик ўстириш мумкин.

Автомобилсоз компанияларнинг бари маҳсулотини электрон технологиялар билан безаётган маҳалда ижодкор ва табиатни севувчи швейцарияликлар “Оазис”ига электромотор ва автопилот ўрнаштиргани етмагандек олд ойнанинг остини кўкаламзорлаштириб қўйди. Ўзингиз кўриб баҳо беринг.

Rinspeed компанияси бу митти боғчада кичикроқ редиска, кўкатлар ўстирса бўлади, тиқилинчга тушиб қолганда кавшаб ўтирасиз, деб маслаҳат бермоқда.

Oasis овоз ёрдамида бошқариладиган электрон ёрдамчига эга. Қурилма, ҳатто, камераси билан расмга олиб “Инстаграм”га жойлаб қўйиши мумкин. Олд панел 5К сиғимли ботиқ экран кўринишида бўлиб, имо-ишорани тушунади. Автопилот режимида рул чамбарагини йиғиштириб қўйиш мумкин. Дарвоқе, рул чамбараги механик соат билан безалган.

Қурилмалар кўрсатган маълумот олд ойнада акс этади, машина юкхонасида эса иситиш ва совутиш ускунаси ўрнатилган. Швейцарияликлар зарурият туғилганда унда бирор озиқ-овқатни айнитмасдан ташишни режалаштирган. Келажакда “Оазис”да юришни истаганлар каршеринг хизматидан фойдаланиши мумкин. Смартфон иловаси орқали тегишли манзилга буюртма берасиз ва автомобиль етиб келиб сизни керакли жойга элтиб қўяди. Фақат томорқада ўсаётган редисканинг ҳаммасини еб қўймасангиз бўлди 🙂

Rinspeed Oasis боғчамобилининг намойиши Лас-Вегасдаги CES истеъмол электроникаси кўргазмасида ўтказилади.