Сингапур гиперкарининг янги тасвирлари пайдо бўлди

Сингапурнинг Vanda Electrics компанияси Dendrobium электрли гиперкарининг янги суратларини тарқатди. Гиперкарни Женева автосалонида намойиш этишга тайёргарлик кўрилмоқда.

Электрокар Williams Advanced Engineering фирмаси билан ҳамкорликда тайёрланмоқда. Фирма Williams Groupнинг бир қисми саналади. Компания инженерлари автомобилнинг аэродинамикаси, тузилиши ва компоновкаси учун масъулдир. Vanda Electricsнинг кейинги русумлари ҳам Williams кўмагида ишлаб чиқарилади.

Женевада икки ўринли, томи ва эшиклари автоматик тарзда очилувчи Dendrobium концепти кўрсатилади. Motor1 порталига компания вакилининг айтишича, машина эшиклари Сингапурда ўсадиган дендробиум гулининг япроқлари каби синхрон равишда очилади.

Электромобилнинг мотори ва бошқа техник тафсилотлари сир тутилмоқда. Норасмий хабарларга қараганда 90 ёки 100 кВт•соатли бир ярим минг от кучига эга двигатель ўрнатилади. Гиперкар 96 км/соат тезликка эришиши учун 2,6 сония кифоя қилади. Энг юқори тезлиги соатига 400 км, шунингдек, йўл захираси ҳам 400 км.