Skoda йирик Kodiaq кроссоверини тақдим қилди

Куни кеча Берлинда Skoda компанияси ўз тарихидаги энг йирик кроссоверни намойиш қилди. Autonews.ru нашрининг хабар беришича, Kodiaq номли ушбу кроссовер 2017 йилдан Россия бозорида сотувга чиқарилади.

Янги кроссовер шу йилнинг баҳорида Женева автосалонида кўрсатилган VisionS концептининг базасида яратилган. Kodiaq диодли оптика, спойлер, катта радиатор панжараси ва пластик қатламли эшиклар ҳимояси тизими билан таъминланган. Янги кроссовернинг узунлиги – 4,7 м, юкхонанинг максимум ҳажми – 2 065 литр. Таъкидлаш керак, Kodiaq ўз таснифидаги энг йирик юкхонага эга моделлардан ҳисобланади.

Автомобилга Apple CarPlay ва Android Auto сервисларини қўллаб-қууватлайдиган, Google навигация ҳамда Wi-Fi роутер кўзда тутилган Skoda Connect мультимедиа тизими ўрнатилган.  Kodiaq салони худди Superb автомобилининг интерьери каби диодли фон билан ёритилади. Шунингдек, климат-контроль ва асбоблар панели ҳам мазкур автомобилдан кўчирилган.

Skoda Kodiaq Volkswagen Tiguan каби такомиллаштирилган MQB платформасида тайёрланган. Кроссовер 5 хил мотор (3 та бензин ва 2 та дизель) вариантларида тақдим этилади. Моделнинг оддий комплектациясига 1,4 TSI (125 от кучи) двигатели ва олти поғонали механика ўрнатилади. Энг кучли версия эса 2,0 литрли 180 та от кучига эга турбо мотор билан таъминланади. Ушбу версиядаги мотор роботлаштирилган DSG7 коробка ёрдамида бошқарилади.

Бошланғич дизелли версияга 2,0 литрли 150 та от кучига эга бўлган агрегат (DSG7 билан бирга) ўрнатилади. Айнан мана шу кўрсаткичдаги агрегат тўлиқ узатмали вариантда ҳам қўлланилади. Фақат унинг от кучи бошланғич моделга қараганда 40 тага оширилади.

Skoda Kodiaq аввалги моделларга татбиқ этилмаган бир қатор янги функцияларга эга бўлади. Масалан, бамперни оёқ билан силташ орқали бешинчи эшикни ёпиш ёки смартфонларни симсиз зарядлаш технологиясини бунга мисол қилиш мумкин. Шунингдек, буюртма асосида кроссоверга учинчи қатор ўриндиқлари ҳам ўрнатилиши мумкин.