«Смарт»нинг электр-версиясига Renault моторлари ўрнатилади

Янги авлод Smart ForTwo ва ForFour компакт-карларининг электрда ҳаракатланувчи модификацияларига Renault компанияси моторлари ўрнатилади. Бу ҳақда Daimler концерни раҳбари Дитер Цетше ва Renault-Nissan альянси бошлиғи Карлос Гон Франкфурт автосалонида Autocar нашрига маълум қилди.

«Смарт»лар ҳозирги вақтда Renault Zoe хэтчбекларига ўрнатилаётган ва 95 от кучига эга электромоторлар билан таъминланади. Айни вақтда ForTwo ва ForFour «Даймлер» назорати остидаги бошқа бир компания томонидан ишлаб чиқилган аккумляторлар блокини олади.

Smart ForTwo

Бензин двигатели ўрнатилган Smart ForTwo ва ForFour автомобиллари тақдимоти 2014 йил ёзида бўлиб ўтган эди. Улар Daimler концерни томонидан Renault билан ҳамкорликда ишлаб чиқилган янги платформада тайёрланган. Мазкур архитектура дастлаб янги Renault Twingo хэтчбекига қўлланилган бўлиб, «Смарт»лар у билан 70 фоизга ўхшаш.

Эски авлод электр-«Смарт»ларига сиғими 17,6 киловатт/соат бўлган литий-ионли батареялардан қувват олувчи 74 от кучили мотор ўрнатилган эди. Smart ForTwo ED 13 сония ичида соатига 100 километр тезликка эришади, энг юқори тезлиги эса соатига 120 километрга тенг. Мазкур автомобилларни ишлаб чиқариш 2015 йил августида тўхтатилган эди.