“Суюқ электр”га ишловчи машина. Бунақаси бўлмаган

Женева автосалонига келтирилган ушбу машиналар автосаноатда инқилоб ясаши мумкин.

2015 йилда nanoFlowcell AG компанияси иккита ғаройиб электромобиль нишона нусхасини намойиш этганди: Quant F спорт седани ва Quantino ихчам хэтчбеки. Электромобилларнинг ўзига хослиги шундаки, улар суюқ (оқувчан) батареяга ишлайди. Худди шу автомобиллар Женевага ҳам келтирилди. Бу гал уларнинг деярли серияли ишлаб чиқаришга мўлжалланган турини кўриб турибмиз.

Ўтган вақт давомида электромобилларнинг қаери ўзгарди? Ташқи қиёфасида ўзгариш асари йўқ. Ўша таниш спорт автомобили ва шаҳар хэтчбеки. Quant F автомобилига 1090 от кучига тенг мотор ўрнатилган, 2,8 сонияда тезликни юзга чиқаришга қодир. Энг юқори тезлиги 280 км/соат. Quantino анчагина камтар русум бўлиб, 109 от кучини ўзида жамлаган. 5 сонияга етмай юзга чиқади. Энг юқори тезлиги 200 км/соат. Шаҳар машинаси учун бу етарли кўрсаткичлардир.

Асосий янгиликларнинг бири шуки, Quantino Европа йўлларида юриш учун расмий рухсатнома олди. Иккинчидан, электромобилни ишлаб чиқарганлар 14 соат узлуксиз Quantinoни бошқариб кўрди. Синов якунига бориб хэтчбекнинг электролит бакида 78 фоиз ёнилғи қолиб кетди. Бу ёнилғи захираси минг кмдан ошиққа етишининг исботидир.

Шундай қилиб, “суюқ электрли” автомобиль магазинларга чиқадиган кунлар яқин.