Тайванликлар Франкфуртга Tesla’нинг рақобатчисини олиб келади

Тайваннинг Thunder Power компанияси Tesla Model S билан рақобатлашиши мумкин бўлган электрокар тизерини эълон қилди. Номи ҳозирча сир тутилаётган концепт-карнинг премьераси Франкфурт автосалонида бўлиб ўтади.

Лойиҳага Bugatti компаниясининг собиқ техник директори Петер Тутцер раҳбарлик қилган. Тайванликлар мазкур моделда «Европа технологиялари»ни «итальян дизайни» билан уйғунлаштиришга ваъда бермоқда. Ҳозирги вақтда прототип Миланда синовдан ўтмоқда.

Янги автомобиль беш сонияда соатига 100 километрлик тезликка эришиш имконини берувчи 430 от кучига эга электромотор билан таъминланади. Энг юқори тезлик соатига 250 километр билан чекланган бўлиб, электрокар бир марта тўлиқ қувватлантирилганидан сўнг 600 километргача йўл боса олади.

Thunder Power сериялаб ишлаб чиқариладиган моделларни 2017 йилда Европага етказиб беришни режалаштирмоқда. Дастлабки маълумотларга кўра, мазкур машинанинг нархи 55,5 минг евродан бошланади.

Аввалроқ Хитойнинг Youxia Motors компанияси Tesla Model III харидорлари учун курашиши мумкин бўлган компакт электро-седанни намойиш этган эди. Тўрт эшикли ушбу машинага 348 от кучига эга электромотор ўрнатилган бўлиб, седан 5,6 сонияда соатига 100 километрлик тезликка эришади. Модель Хитойда 300-400 минг юань (32-48 минг доллар) нарх атрофида сотилади.