Tesla Model X «биоқуролга қарши мудофаа тизими» билан қуролланди

Tesla Motors ниҳоят узоқ йиллар кутилган Мodel X кроссоверини тақдим этди. Уч қатор ўриндиққа эга SUV дастлаб 2013 йил сотувга чиқарилиши кутилган эди. Аммо унинг оммага тақдим этилиши бир неча бор ортга сурилди ва расман 2015 йил 29 сентябрь куни Калифорнияда ўтказилган улкан тақдимот маросимида автомобилнинг дастлабки нусхалари биринчи эгаларига топширилди.

Фақат электромобиллар ишлаб чиқарувчи Тесланинг учинчи маҳсулоти бўлган Модел Х, айни пайтда, компаниянинг биринчи кроссоверидир.

Тақдимот маросимида компания асосчиси ва раҳбари Элон Маск Мodel Хни дунёдаги энг хавфсиз кроссовер деб атади. Хавфсизлик бўйича мавжуд қулайликлар орасида автомобилнинг бирор жисмга урилиш хавфи туғилганда автоматик тормоз босиши алоҳида эътиборга молик. Модел Х ўнг, чап ҳамда орқа томондан келаётган хавфларни ҳам сезади.

Электромобиль, шунингдек, энг кучли ҳаво филтрларига эга. Маскнинг даъво қилишича, ойналар ёпилганда машина ичига ташқаридан заррача ҳам чанг ёки бошқа зарарли моддалар кирмайди. Ҳаво филтрларининг энг кучайтирилган режими “биоқуролларга қарши мудофаа тизими” деб номланган. Ташқарида ҳар қанча заҳарли газ бўлмасин, машина ичи клиникалардаги ҳавоси энг тоза хоналар билан бир хил даражада бўлади, деди Маск.

Тесла мижозларига ана шундай ғайриоддий номли режимларни тақдим этиши билан таниқли. Моdel S русумидаги автомобилнинг энг кучли тезланиш олиш режимларига “Ақлдан озиш” (Insane) ва “Беъмани” (Ludicrous) деган номлар берилган.

Моdel Х’нинг 2-қатор ўриндиқларини битта тугмачани босиш орқали олдинга суриш ёки пастга эгиш мумкин. Бу 3-қаторга ўтиш учун қулайлик яратади.

Автомобилнинг энг кўп гапирилган дизайнидаги ўзига хослик унинг “лочин қанотли эшиклари”дир. Моделнинг орқа ўриндиқ йўловчилари чиқадиган икки эшиги одатдаги автомобилларникидек ёнга эмас, балки қуш қанотидек тeпага очилади. Улар махсус сенсорлар ёрдамида гаражнинг томи ёки ёнидаги объектларни сезади ва шунга мос тарзда қиялигини ўзгартириб, икки ёнидаги машиналар ёки бошқа объектларга тегмасдан очилади.

Моdel Х икки хил версияда тақдим этилади: 90D ва P90D. 90D модели олд ва орқада ҳар бири 259 от кучига эга иккита моторга эга. P90D эса олдида 259, орқада 503 от кучига эга иккита двигатель билан жиҳозланган. Биринчи версиядаги модел 98 км/соат тезликка 4,8 сонияда чиқади ва бир марта тўлиқ зарядланганда 414 км. йўл босади. Кучлироқ P90D версияси эса оддий режимда 98 км/соат тезликка 3,8 секундда, “Ақлдан озиш” (Ludicrous) режимида эса 3,2 сонияда чиқади. У тўлиқ зарядка билан 400 км йўл босади. Автомобилнинг батарея ва двигателига 8 йиллик кафолат берилган.

Моdel Х 90Dнинг бошланғич баҳоси 132 минг АҚШ доллари бўлса, P90Dнинг нархи 142 минг АҚШ долларидан бошланади. Автомобилга Тесла сайтидан буюртма бериш мумкин. Ҳозир сотиб олиш истагини билдириб навбатга турганлар yни 2016 йилнинг иккинчи ярмида қўлга киритишлари мумкин. Чунки автомобилни харид қилиш учун навбатда турганлар жуда кўп.