Тошкент — Андижон темирйўл йўналишида ҳалокат содир бўлгани ҳақидаги гап-сўзлар асоссиз бўлиб чиқди

23 январь куни соат 8 да “Тошкент — Андижон” йўналиши бўйича қатновчи йўловчи поездида қатнов бекор қилингани, сотилган чипталарнинг пули эса қандай шаклда тўланганидан қатъий назар нақд пулда тўлиқ қайтариб берилгани одамлар ўртасида турли миш-мишларни келтириб чиқарган. Уларга кўра ушбу йўналиши бўйича қатнаётган юк поезди изидан чиқиб кетиб, ҳалокатга учраган.

Мутасаддилар мазкур хабар ёлғонлиги, чипталарнинг қайтарилишининг сабаби эса бошқа эканини, ижтимоий тармоқларда тарқалган миш-мишлар ва нотўғри маълумотнинг олдини олиш учун бу ҳақда тез орада расман баёнот берилишини маълум қилишди. Railway.uz сайтида қуйидаги баёнот эълон қилинди, деб ёзади Sof.uz сайти.

“Ҳурматли йўловчилар, ҳаракат хавфсизлигини таъминлаш мақсадида 23 январь куни техник кўрик ишларини ўтказиш сабабларига кўра Тошкент — Андижон — Тошкент йўналишида қатновчи 61/62, 60/59–сонли йўловчи поэздлари ҳаракати вақтинча тўхтатилди.

Ушбу жараёнда тарқатилаётган турли хил асоссиз хабарларга эътибор қаратмаслигингизни сўраймиз!

“Ўзбекистон темир йўллари” АЖ”