Тошкентда яна бир янги йўл ўтказгич қурилиши бошланади

Тошкентда кичик халқа йўли ва Фарғона йўли кўчаси туташган жойдаги йўл ўтказгич реконструкция қилинади ҳамда бир қисми янгидан қурилади. 25 март куни Шавкат Мирзиёев ушбу лойиҳа билан танишди, деб хабар қилади Sof.uz.

Унинг эни 30, узунлиги 346 метр бўлган қисми реконструкция қилинади. Эни 22, узунлиги 281 метр бўлган қисми янгидан қурилади. Кўприкнинг икки томонида пиёдалар йўлакчаси қурилиб, тунги ёритгичлар ўрнатилади.

Шунингдек, пойтахтимизнинг Чўпонота ва Бунёдкор кўчалари кесишган чорраҳада ҳам кўприк бунёд этилади.

Шанба куни Тошкент шаҳрининг Чилонзор туманидаги Бунёдкор ва Муқимий кўчалари кесишган чорраҳада қурилган кўприк очилди. Умумий узунлиги 900, баландлиги 6, кенглиги 24 метр бўлган 6 полосали мазкур йўл ўтказгич ҳайдовчилар ва пиёдаларга бир қанча қулайликлар яратади.