Toyota FT-4X Concept: тўрт ғилдиракли трансформер

Toyota Нью-Йоркда ғаройиб кроссоверни намойиш этди. Унинг номи FT-4X Concept.

Toyota FT-4X деганларининг таърифини қанча келтирилмасин, унутилган FJ Cruiser русумига ўхшашини таъкидлаш жоиз. FT-4X кичикроқ, шаҳар шароитига жуда мос, шу билан бирга тўсиқларни писанд қилмайди.

Дизайни бугун кенг тарқалган квадратча услубда тайёрланган. Диққатга сазовор жиҳати шундаки, юкхонасининг эшиги тўлалигича тепага ёки икки ёнга ажралиб очилиши мумкин. Албатта, турмушда бу фойдадан холи бўлмайди.

«Тойота»нинг салонидаги кўплаб фойдали қурилмаларини назарда тутиб, трансформер, дея атамоқдамиз. Аудиотизим шаклини ўзгартирсангиз, бумбоксга (кўтариб юриладиган аудиомарказ) айланади. “Тойота” миниб шаҳардан ташқарига саёҳатга отлансангиз, асло зерикиб қолмайсиз. Салон плафони ҳам шунга ўхшаш: чиқариб олинг ва фонарча қўлингизда. Ўртадаги тирсакқўйгични очиб ётоқ қопини олишингиз мумкин.

Автомобиль ёшларга мўлжалланган бўлиб, табиат қўйнига, денгиз бўйига саёҳатга чиққанда қўл келади. Юкхонасида йиғиладиган ва ҳўл бўлмайдиган чодир бор.

FT-4X ҳозир концепт. Аммо тўрт цилиндрли двигатель ўрнатилиб TNGA платформасида ишлаб чиқарилиши мумкин.