Toyota Санкт-Петербургда RAV4 моделини ишлаб чиқаришни бошлади

Toyota концернининг Санкт-Петербургдаги заводида RAV4 русумидаги кроссовер ишлаб чиқарилиши бошланди. Компания матбуот марказининг хабар беришича, мазкур лойиҳага 9, 7 млрд рубль миқдорида сармоя сарфланган.

Россияда тайёрланадиган RAV4 автомобиллари Козоғистон ва Беларусь давлатларига ҳам экспорт қилинади. RAV4 русумидан ташқари Санкт-Петербургдаги заводда 2007 йилдан бери Toyota Camry седани ҳам йиғилади.

Иккинчи моделнинг тайёрланиши сабабли 2015 йилнинг охирида заводнинг қуввати икки карра оширилди. Эндиликда заводда йилига 100 минг дона автомобиль йиғилади. Шунингдек, 800 та янги иш ўринлари очилиши ҳам кўзда тутилган.

“Санкт-Петербургда Toyota RAV4 моделининг ишлаб чиқарилиши, компаниянинг Россиядаги барқарор ривожланишидан дарак беради, биз минтақа ва мамлакат иқтисодиётига ҳисса қўшишдан мамнунмиз”, — дейди «Тойота Мотор» МЧЖ раҳбари Хидэнори Одзаки.

Ўтган йили компания Toyota RAV4 моделининг янгиланган версиясини намойиш қилган эди. Автомобилнинг ташқи кўринишига баъзи ўзгартиришлар киритилди, шунингдек, унга гибрид модификация татбиқ этилди (гибрид версия Россия бозорида сотилмайди).

Янги Toyota RAV4 ўтмишдошидан оптика тизими ва радиатор панжараси билан ажралиб туради. Орқа тарафдан кроссоверни бошқа фаралардан ажратиш мумкин. Салондаги мультимедиа экрани катталаштирилган. Модель рестайлингдан кейин аввалги версияларда мавжуд бўлмаган бир нечта янги функцияларга ҳам эга бўлган. Масалан, буларга тўрт тарафни кўрсатадиган 4 камерали намойиш тизими, адаптив круиз назорат ва узоқни ёритишнинг автоматик бошқарувини айтиб ўтиш мумкин.