Toyota уч ғилдиракли енгил электромобилни намойиш этди

Япониянинг Toyota компанияси Automotive World 2017 кўргазмаси доирасида ғаройиб электромобиль концептини кўрсатди. Вазни бор-йўғи 300 кг бўлишига қарамасдан у соатига 100 км тезликда ҳаракатлана олади. Ғилдираклари сони учта.

Дастлабки прототипи 2016 йилда жамоатчиликка кўрсатилган, аммо у стандарт тўрт ғилдиракли багги кўринишида эди. Двигателининг қуввати оз, тезлиги эса 60-70 км/соатдан ортмасди. Электрокар “багги” синфига мансублигига қарамасдан текис йўлда юрарди холос.

Янги версиясининг узунлиги 260, кенглиги 130 см. Икки киши жойлашади. Ягона орқа ғилдираги етакчи. Машина йўлга яхшироқ илашиши учун электродвигатель ва аккумулятор йўловчи ва ҳайдовчининг орқасига ўрнаштирилган. Двигателнинг энг юқори қуввати 11,7 кВт (16 о.к.). Литий-ионли батареяси 10 кВт•соат сиғимга эга.

Уч ғилдиракли электромобиль тўла заряди билан 160 км йўл босади.