“Тойота” янгиланган GT86 купеси интерьерини намойиш этди
Toyota компанияси янгиланган GT86 купесининг илк расмий суратларини эълон қилди. Модель премьераси 2016 йил апрелида Нью-Йоркдаги моторшоуда бўлиб ўтганди, бироқ автомобиль салонининг суратлари энди пайдо бўлди.
Купе диаметри 362 миллиметрли рул чамбараги билан таъминланган — бу сериялаб ишлаб чиқарилган “Тойота”лар тарихидаги энг кичик рулдир. Икки эшикли автомобилга замонавий тахометр ҳам ўрнатилган, унинг “қизил ҳудуди” етти мингинчи айланмадан сўнг бошланади.
Шунингдек, ускуналар панелида 4,2 дюймли TFT-дисплей ҳам пайдо бўлган бўлиб, у ерда юкламалар ҳажми, аниқ қувват ва айланишлар сони, шунингдек, акселератор педали ҳолати ва рулнинг бурилиши бурчаги ҳақидаги ахборот кўрсатиб турилади.
Олти босқичли “механик” узатмалар қутиси билан ҳамоҳангликда янгиланган Toyota GT68’нинг ҳажми икки литрли мотори 207 от кучи беради. Автомобилнинг “автомат” версиясининг қуввати эса эскисиники каби 200 от кучига эга.
Орқа тиргакларнинг маълум нуқталар бўйича пайвандлангани натижасида модель конструкцияси нисбатан мустаҳкам кўриниш олган. Қўшимча тўлов эвазига машинага Sachs компанияси амортизаторлари ўрнатиб берилиши мумкин.
Купенинг оддий версиясида асосий чироқлар ёруғлик диодли бўлади, GT ва GT Limited версиялари эса туманга қарши LED-унсурли чироқлар билан таъминланади.
Янгиланган Toyota GT86’нинг Япониядаги савдолари 1 августдан бошланади. Моделнинг энг арзон версияси 2,62 миллион иена (25,8 минг доллар)дан, энг қиммат версияси эса 2,98 миллион иена (29,3 минг доллар)дан сотувга қўйилади.