Toyotaдан ҳамёнбоп спорт автомобили

Токиода дунёга таниқли Toyotaнинг “кичик укаси” дунёга келиши кутиляпти.

Компания янги S-FR концептуал спорт автомобилининг расмини эълон қилди. Арзонлигидан дарак берилган янги автомобиль октябрь ойининг охирларида Токиодаги автосалонда тақдим этилади.

Toyota S-FR дизайни ретро услубини ёдга солади. Бошқа томондан эса Toyota GT-86 спорт автомобилига ўхшаб кетади. Янги концепт ўлчами 3990 мм х 1695 мм х 1320 мм, ғилдирак базаси билан 2480 мм.

Машинанинг мосламалар панели, иқлим назорати тизими, двигателни ўт олдириш тугмаси, кўп функцияли руль тўлалигича рақамли жиҳозланган бўлса-да, дизайнер интерьерда минималликка интилгани сезилади.

Шунингдек, механик узатмалар қутисининг олти поғонали ричаги эътиборни тортади. Аммо Toyota на трансмиссия, на двигател ҳақида маълумот берди. Спорт автосининг жадал тезланиш олиши, оғирлиги ўқ бўйича тенг тақсимлангани, бошқарувга ўнглиги маълум холос.

Норасмий хабарларга кўра, янги концептда 1,5 литрли 130 кучли мотор бўлади. Toyota S-FR спорт автоси 2018 йилдан сотувга чиқарилиши кутилмоқда. Ишлаб чиқарувчиларнинг таъкидлашига қараганда, янги модел арзонроқ бўлади.