Тутунчиқаргичга ҳам ғилдирак ўрнатиб
Реклама ва ном таратиш учун одам нималарга қўл урмайди, дейсиз? Гоҳ автомобиль-телефон, гоҳ автомобиль-бутилка тайёрлайди. Бугун тутунчиқаргич (глушитель) шаклида ясалган Mufflermobiles билан таништирамиз
АҚШ автосаноати ва рекламачилари кўзга илинган нарсага ғилдирак ўрнатиб, реклама қилишга ишқибоз. Автомобиль глушителини ишлаб чиқариш ва сотиш яхшигина бизнес саналади. Бу бизнес билан уммон ортидаги йирик компаниялар шуғулланади. Реклама сифатида улар “маффлермобил”лар ҳам ясаб намойиш қилган (инглизча muffler – “глушитель”).
Маффлермобилларнинг энг таниқлиси Америка эмас Канадада ясалган Steve’s Mufflermobile ҳсобланади. 1948 йилги Willys Jeep CJ2A шассисига ўрнатилган машина дунёдаги ягона вертикал маффлермобилдир (қолганларининг кузови горизонтал жойлашган). Унинг бўйи 2,4 м, узунлиги 3,3 м. 2012 йилда унинг эгаси eBayда сотган, шундан бери турли автошоуларда кўриниш бериб туради.
1992 йилда АҚШнинг Нью-Жерси штатида Muff Mobile ясалган. Уни 2 литрли Mitsubishi мотори ҳаракатлантиради.
Бу ҳам eBay майдончасида 3500 долларга сотилиб кетган.
Quiet Cruiser (“Ювош саёҳатчи”) номини олган пикап ҳам бўлган. Жанубий Дакота штатида ясалган бу маффлер-пикап Craigslist кимошди савдосида 4800 долларга сотилган.
Бу эса Вашингтон штатида ясалган Quality Muffler Hut.
Умуман айтганда маффлермобилсозлик авторекламанинг кенг тарқалган жанрларидандир. Реклама эса бизнеснинг двигатели эканлигини таъкидлаб ўтирмаймиз.