УАЗ “буханка”нинг салонига саёҳат

Февраль ўрталарида УАЗ компанияси эл орасида “буханка” деб юритилувчи автомобилини янгилагани ҳақда хабар берган эдик. Вақт етиб “буханка” салонининг суратлари эълон қилинди.

Модернизация натижасида машинанинг рамаси ва кузов кронштейнлари кучайтирилган, двигатель шовқини ҳимояланган, кузов эса шовқин ва титрашдан муҳофазаланган. Интерьерга бир оз ишлов берилган.

Энди салон ичкарисига назар солиш имконига эгамиз. Автомобилга янги ўриндиқлар ўрнатилган бўлиб, уларни бўйламасига ростлаш мумкин. Ўриндиқлар иситилади. Айрим модификацияларида орқа салон йўловчилари учун қўшимча иситкич мавжуд.

Ускуналар комбинацияси ўзгарганлигининг аломати кўзга ташланади: тўрт циферблатдан иборат блок олиб ташланган, унинг ўрнига панел ўртасида битта циферблат бор. Олд панелда ўриндиқларни иситиш, ҳалокат сигнализациясини ёқиш тугмаси ўрнатилган. Магнитола учун уяча, 12 вольтли розетка ва қўлқоп қутиси мавжуд.

Очиғини айтганда машина салони янгиланганлиги сезилмайди, ҳаттоки узоқ муддат ишлаган автомобил салонидан кўп фарқи йўқ. Дилерларнинг ўзи ҳам буни тасдиқлади. Шунга қарамасдан УАЗ савдоси бошланди, машиналар дилерларга етказиб берилди.

Одатда “буханка” автомобиллари, асосан, геология, қишлоқ хўжалиги, темирйўл сингари тармоқларда дала-дашт, чўл ва тоғ шароитида хизмат қилади.