Велосипедми бу ё шайтон арава?.. (видеолар)

Бакир Назаров
08-05-2017

Велосипед энг арзон, экологик ва фойдали транспортдир. Атиги икки аср бурун ким ўйлабди дейсиз, икки оёқ орасига олганча тепиб ҳаракатлантириладиган шайтон арава ихтиро қилинишини. Дарвоқе, қуйида саралаган велосипедларимизнинг ҳаммаси ҳам сизу бизга таниш анъанавий велосипедга ўхшамайди.

Lopifit

Бунинг нималигини айтиш мушкул. Бир қарашда велосипедга ўхшайди, икки ғилдираги ва рули бор. Яна бир қарашда югуриш йўлакчасини эсга солади. Қандай ишлашини билиш учун видеони томоша қилинг. Унинг электрли двигатели соатига 25 км тезликда эгасини таший олади, двигателнинг ўзи бўлса устида “юраётган” эгасининг қадамидан қувватланади. Тўғри, “Лопифит” деганларининг ноқулайликлари ҳам бисёр. Биринчидан, унинг вазни 55 кг бўлиб, етаклаб юриш даҳмазанинг ўзи. Иккинчидан нархи қиммат. 2 минг долларга велосипед олиб минасизми?

Fliz bike

Антиқа велосипедларнинг яна бири Fliz bike. Велосипед эмас, ғилдиракли каттакон кийим илгич. Аммо уни велосипед демасликка асос йўқ, бинойидек рамаси ва бир жуфт ғилдираги бор. Самокат каби тезгина ҳаракатланади. Энг муҳими, занжири ҳайдовчининг иштонини ғажиб кетмайди.

Bergmonch

Велосипеднинг нуқсонларидан бири унинг қўполлигидир. Машинага сиғмайди, юкхонадан туртиб чиқиб қолади, балконда халақит беради, тоққа чиққанда айиқнинг ўлигига айланади. Аммо Bergmonchни олингу, ноқулай велосипед ҳақида унутинг. Чунки унинг юкхалтаси ўзида. Вазни бор-йўғи 9,5 кг, аммо нархи 1,5 минг евро. Бироқ видеони кўриб, харид қилишга арзишига амин бўласиз.

Sandwichbike

Велосипедни жойлаштириш муаммосини ҳал этиш йўлидаги яна бир уриниш билан танишинг. Sandwichbike баҳоси 900дан 1400 еврогача туради. “Сендвичбайк”нинг бошқа велосипедлардан фарқи – уни болалар конструкцияси каби ўзингиз йиғасиз. Муаллифлар бунинг ҳеч бир қийин жойи йўқлигини уқтирмоқда. Дарвоқе, унинг рамаси металлдан ҳам, карбондан ҳам эмас, ёғочдандир.

Ele

Одатдаги велосипедларни паст-баландликларда, хусусан, қир-адирда ҳайдаш ноқулай. Тепки боссанг, оёғингни қайтаради. Бу масалани ечиш учун велосипедсозлар электрли велосипед ясашга ўтди. Унинг кичкина аккумулятори ва электрли двигатели ва …нуқсони ҳам бор. Заряди тугаб қолиши мумкин, вазни оғиргина. Бироқ келажакда уларга қуёш батареяси ўрнатиш режалаштирилмоқда. Масалан, Ele велосипедининг ғилдиракларида қуёш панеллари бўлиб, нур томонга ўзи бурилади. Тунда нима қиламиз, дейсизми? Велосипед эканлиги эсингиздан чиқиб қолмаслиги учун тепкини босасиз-да.