Vision Mercedes-Maybach 6 электрокарининг концепти намойиш этилди

Ниҳоят Mercedes компанияси ўзининг янги автомобиллари билан электрокарлар саноатига кириб келмоқда. Автогигант шу кунларда ўтказилаётган Monterey Car Week ҳафталигида 6 метрли тўлиқ электр қувватида ҳаракатланадиган ҳашамдор Vision Mercedes-Maybach 6 электрокарини намойиш этди.

Концепт Maybach сериясидаги янги йўналишга айланиши айтилмоқда. Тахминларга қараганда, ушбу модель келгуси йилда Bentley Continental GT ва Rolls-Royce Wraith билан рақобат қилиш учун ишлаб чиқарилади. Электромобиль бағоятда ҳашамдор, элементлар уйғунлиги кишини ҳайратга солади.

Айтишларича дизайнерлар модель прототипини ўтган асрнинг охирида пайдо бўлган аэрокупелардан илҳомланиб яратишган. 80 кВт/соатли аккумулятор барча моторларни қувватлаб, тўрттала ғилдиракнинг ҳаракатланишига имкон беради. Модель 738 та от кучига эга.

Аккумулятор Mercedes 2018 йилда ўз автомобилларига ўрнатадиган CCS (Combined Charging System) стандартига асосланган тезкор зарядлаш тизимидан қувватланади.