Volkswagen экологларни алдагани учун рекорд даражадаги жаримага тортилиши мумкин

АҚШ Атроф-муҳитни муҳофаза қилиш агентлиги (EPA) Volkswagen концернини ҳажми икки литр бўлган тўрт цилиндрли турбо-мотор билан таъминланган машиналардан чиқаётган зарарли моддаларнинг ҳақиқий миқдорини каамайтириб кўрсатганликда айблади. Automative News’нинг хабар беришича, Германия компанияси АҚШда автомобиль ишлаб чиқарувчиларга солинган тарихдаги энг катта жаримани тўлаши мумкин.

EPA вакилларининг маълум қилишича, VW ўзининг дизель автомобилларига экологик тестлар вақтида зарарли моддалар чиқариш ҳажмини сезиларли камайтирувчи махсус дастурий таъминот ўрнатган. Текширувчи қурилма ўрнатилиши билан мотор «тоза режим»га ўтиб қолган. Назоратдан ўтганидан сўнг двигателлар одатий созламаларга қайтарилган. Оқибатда, қайд этишларича, зарарли азот диоксиди ажратмалари миқдори белгиланган стандартдан 40 баробар кўпроқ чиққан бўлиши мумкин.

EPA’нинг тахминича, мазкур сохтакорлар АҚШ ҳудудида 2008 йилдан бери сотилган 482 минг машинада татбиқ этилган бўлиши мумкин. Улар орасида Jetta, Beetle, Golf’нинг дизель двигателида ҳаракатланувчи версиялари, Passat’нинг янги авлоди, шунингдек, Audi A3 ҳам бор. Федерал қонунга мувофиқ, сотилган ҳар бир нобоп автомобиль учун энг юқори жарима миқдори 37,5 минг долларга тенг бўлиб, «Фольксваген» тахминан 18 миллиард доллар — АҚШ автомобилсозлиги тарихидаги энг йирик жаримага тортилиши мумкин.

«Мижозларимиз ва жамоатчилик ишончини поймол қилганимиздан жуда ҳам афсусдаман. Биз томондан етказилган зарарни қоплаш учун қўлимиздан келган барчасини қиламиз», — дейилади «Фольксваген» раҳбари Мартин Винтеркорннинг расмий баёнотида.

Ҳозирги вақтда Volkswagen АҚШдаги дилерларидан ҳажми икки литр бўлган дизель двигатели ўрнатилган автомобиллари савдосини тўхтатишни талаб қилди.

Ушбу хабар чиқиши ортидан компаниянинг акциялари нархи 20 фоизга тушиб кетган.  Натижада Volkswagen’нинг биржа бозоридаги қиймати қарийб 17 миллиард доллар йўқотган.