Volkswagen: миллионлаб автомобиллар хавф остида

Бирмингем университети тадқиқотчилари ва Германиянинг Kasper & Oswald муҳандислик компанияси Volkswagen томонидан ишлаб чиқарилган автомобилларнинг хавфсизлик тизимида жиддий носозликни аниқлашди. Гап шундаки, ўғрилар ушбу концернга тегишли моделларнинг эшикларини ортиқча қийинчиликларсиз очишлари ва салондаги буюмларни ўғирлаб кетишлари мумкин.

Хавфсизлик тизимидаги кодлар автомобилнинг эгаси дистанцион пультдан уни бошқарганида масофадан туриб олиниши ва қайта шифрланиши мумкин. Мана шундан кейин, автомобил тўлиқ ўғрининг ихтиёрида бўлади. Аниқроқ қилиб айтганда, Volkswagen автомобиллларининг хавфсизлик тизимида 2 хил код ишлайди: бири – деярли барча Volkswagen моделлари учун хос универсал бирламчи код, иккинчиси – ҳар битта автомобилга тегишли уникал рақамли калит. Биринчи кодни аниқлаш тадқиқотчиларга катта қийинчилик туғдирмаган, иккинчи кодни эса масофадан туриб, хавфсизлик тизими фаоллашганда, ушлаш мумкин.

Ҳар битта автомобил учун универсал бирламчи код яратилса, олам гулистон, дейишингиз мумкин.

Бироқ, қизиғи шундаки, Volkswagen томонидан 25 йилдан бери ишлаб чиқарилаётган моделларни бор-йўғи 3-4 та универсал бирламчи коддан фойдаланилган. Бу эса сўнгги йиллар давомида компания томонидан ишлаб чиқарилган миллионлаб автомобилларни хавф остида қолдиради.

Тадқиқотчилар универсал бирламчи кодни қандай қўлга киритганлари ҳақида маълумот беришдан бош тортишган. Аммо Volkswagen компаниясининг ҳозирча энг хавфсиз моделининг номини қайд қилиб ўтишган. Бу — VW Golf 7 ва унинг базасида яратилган бошқа автомобиллардир.

Носозлик  Audi, Seat ва Škoda моделларида ҳам аниқланган.