Халқ хизматидаги транспортлар

Автобуснинг шакли дизайнерларнинг фантазиясини чеклайди, деб ўйлайсизми? Йўқ, излаган имкон топади. Бунинг исботи сифатида кўркам, серҳашам ва басавлат автобусларнинг 15тасини эътиборингизга ҳавола этамиз.

GM Futurliner

GM Futurliner

Автобуслар фақат йўловчи ташиш учун ясалмайди. Йўловчи ташимайдиган автобуслар орасида GM Futurlinerдан ўтадигани йўқ. General Motors 1939 йилда бунақа автобусдан 12та ясаган бўлиб, улар “Parade of Progress” кўчма кўргазмаси учун мўлжалланган. Бу кўргазмада келажак машиналари технологияси намойиш этилган. Ҳозиргача “Футурлайнер”ларнинг тўққизтаси сақланиб қолган.

Viberti Monotral Golden Dolphin

Viberti Monotral Golden Dolphin

Lancia Esatau шассисида қурилган “Олтин дельфин” 1956 йилда Женева автосалонининг энг кўзга кўринган экспонатларидан бири бўлган. Панорама ойнали, дельфин қанотли, аэродинамик кузовли автобус 400 от кучига эга мотори ёрдамида 200 км/соат тезликда ҳаракатлана олган. Бу 50-йиллар учун ноёб кўрсаткичдир.

Citroen U55 Cityrama Currus

Citroen U55 Cityrama Currus

Этиксимон икки қаватли автобус асосида Citroen U55 шассиси ётибди. Кузовчилар икки қаватли, панорамали кузов тайёрлаб, унинг устига қўндирган. Автобусда сайёҳлар Франция бўйлаб VIP-экскурсияга чиқишган. Cityrama саноқли нусхада чиқарилганига қарамасдан кинофилмда суратга тушишга ҳам улгурган.

Alfa Romeo 500 Varesina

Alfa Romeo 500 Varesina

Иккинчи жаҳон уруши бўсағасида ҳам Alfa Romeo компанияси фаолиятдан тўхтамаган ва 500-серияли уч тоннали юк машиналари ишлаб чиқарган. Кузовчилар юк машинасини автобусга айлантирган. Alfa Romeoнинг энг яхши намуналаридан бирини расмда кўриб турибсиз: аэродинамик дизайнга эга ва тезкор Varesina автобуси.

Mercedes-Benz Lo 3100 Stromlinien-Omnibus

Mercedes-Benz Lo 3100 Stromlinien-Omnibus

Мана бундай автобуслар Германияда 1934 йилдан 1935 йилгача ишлаб чиқарилган. Балиқсимон шакли билан бирга томи ҳам панорама ойнали, ён ойналари туширилади. Бу автобус эркин савдога чиқарилмаган.

AEC Routemaster

AEC Routemaster

Лондон рамзи АЕС Routemaster 1956 йилдан 1995 йилгача Британия пойтахтининг ишонган автобуси эди. Routemaster ўзига хос дизайни ва икки қаватли схемаси туфайли дунёдаги энг машҳур автобуслардан саналади. Бугунгача юзлаб Routemaster автобуслари сақланиб қолган. Улардан МДҲ ҳудудида ҳам экскурсия автобуслари ёки ғилдиракли кафе сифатида фойдаланилмоқда.

Bedford VAL14 Plaxton Panorama C52F

Bedford VAL14 Plaxton Panorama C52F

Номи ҳам ўзи ҳам узун автобус 1965 йилдан 1968 йилгача чиқарилган. Учинчи ўқи ностандарт жойлашуви билан ажралиб туради. Шунингдек, кондиционери борлиги ҳам ўзига хос жиҳатидир. 80-йилларнинг ўрталаригача шаҳарлараро рейсларда Plaxtonлар қатнаган.

ЗиС-127

ЗиС-127

ССРИнинг шаҳарлараро қатновчи биринчи автобуси расмдаги алвон рангли ЗиС-127 бўлади. Ўриндиқлари самолётчасига, баланд пол ва кенг-мўл юкхона. Буларнинг ҳаммаси 50-йиллардаги кишилар учун янгилик ҳисобланган. ЗиС-127 автобусларидан жами 851 нусха тайёрланган.

ЛАЗ Украина-1

ЛАЗ Украина-1

Львов автозаводининг машҳур автобуси хориж кўргазмаларини ҳам забт этган. “Бензоколонка маликаси” филмида суратга тушган. Ягона нусхада чиқарилган прототипга 160 от кучига эга мотор ўрнатилган бўлиб, саёҳатчилар учун мўлжалланган эди. Панорамали томи, 36 йўловчи жойлашадиган кенг ва ёруғ салони туристлар учун айни боп.

Neoplan Jumbocruiser

Neoplan Jumbocruiser

Баландлиги тўрт, узунлиги ўн саккиз метрга етадиган улкан автобуснинг ўзига яраша салобати бор. Иккала қаватига юздан ортиқ йўловчи жойлашадиган Neoplan Jumbocruiser 1973 йилдан 1993 йилгача ишлаб чиқарилди. Унда мини бар ва ҳатто, ҳожатхонагача бор. Улкан автобусни Mercedes мотори ҳаракатга келтиради.

Kässbohrer Setra Super Golden Eagle

Kässbohrer Setra Super Golden Eagle

1958 йилда Setra компанияси бу автобусдан тўрттагина ясаб, АҚШ бозорини забт этмоқчи бўлган. “Олтин Бургут”нинг иккита нусхаси бугунгача етиб келган. Rolls-Royceнинг 275 от кучига эга мотори уни ҳаракатлантиради.

Ikarus 55 Lux

Ikarus 55 Lux

Автобуслар рўйхатимиздан маълум ва машҳур “Икарус”ни қолдириб кетмаймиз. Чунки унинг ўзи бизни йўлда қолдириб кетмасди. Шакли ва двигателининг товуши сабабли ҳайдовчилар уни “Ракета” деб аташган Тўғри, шу номдаги чангюткич ҳам бор.

Peacemaker

Peacemaker

Бу автобус заводдан чиқмаган, аммо дунёдаги энг қойилмақом автобус дейиш мумкин. General American Aerocoach шассисини GMC Scenicruiser кузови билан бириктирган инженерлар уч қаватли ғилдиракли уй барпо этган. Peacemaker икки нусха ясалган, уларнинг бирида АҚШ бўйлаб машҳур қўшиқчи Боб Дилан юрарди.