Хитой Америка электромобилларига миллиардлар тикмоқда

Американинг 1907 йилда ташкил топган Detroit Electric электромобилсоз компанияси Хитойдан стратегик сармоячи топди. “Детройт Электрик”нинг истиқболли лойиҳаларига 1,8 млрд доллар сарфлайдиган Smarter Energy Group компаниясидир.

Шу кунларда икки компания ҳамкорлик битимини имзолади. Компаниянинг Англиядаги заводини реконструкция қилишга 370 млн доллар ажратилади. Айнан шу заводда компаниянинг ягона SP:1 электрли родстери ишлаб чиқарилади. У америкаликларнинг мустақил ишланмаси эмас, электрлаштирилган Lotus Elise холос.

Detroit Electric SP:1 родстерининг 37 кВт∙соат сиғимли батареяси тўла зарядланса, 288 кмни босиб ўтади. Родстер тезкор. 3,9 сонияда юз тезликка чиқади. Detroit Electric “Тесла” йўлидан борди: 10 йил аввалги Tesla Roadster ҳам Lotus Elise асосида ясалган.

Detroit Electric келаси йили электрли кроссоверни конвейердан чиқармоқчи. 2020 йилга бориб эса электрли седан чиқарилади. Америкаликлар йилига юз мингдан ортиқ электромобиль ишлаб чиқаришни режалаштирмоқда.