Хитой углеводород ёнилғисида ҳаракатланувчи автомобиллар ҳаракатига тақиқ қўйиши мумкин

Хитой бензин ва дизелга ҳаракатланувчи автомобилларни тақиқлаши мумкин. Бу ҳақда мамлакатнинг саноат ва ахборот технологиялар вице-вазири маълум қилди. Унинг айтишича янги тартиб электромобилларнинг кўпайишига туртки беради ва автомобиль бозорини ўзгартиради. Бу ҳақда France Presse агентлиги ёзмоқда.

Вице-вазир ҳукуматнинг бу ташаббуси яқин келажакда амалга ошишини билдирди, аммо қачон кучга кириш санасини маълум қилгани йўқ. Аммо бу узоқ вақт талаб қилувчи жараён эканлиги айтилмоқда. Чунки яқин ўн ёки йигирма йилликда анъанавий транспорт воситаларидан воз кечишнинг иложи йўқ.

Автобозор таҳлилчиларининг фикрича, Хитой ички ёнув двигателларидан воз кечиши дунё автомобилсозларига яхшигина сигнал бўлади ва улар бирин-кетин электромобилсозликка зўр бера бошлайди. Чунки ишлаб чиқарувчилар энг катта бозордан ажралишни истамайди. Шунингдек, бу янгилик нефть ишлаб чиқарувчиларга ҳам сезиларли таъсир кўрсатади. Чунки бугун қазиб олинаётган нефтнинг 65 фоизи айнан транспорт соҳасига кетмоқда.