Хитойда ўткинчи ит туфайли иккита Ferrari бир-бирига урилди

Хитойнинг Лижианг шаҳрида иккита қимматбаҳо Ferrari 488 моделидаги автомобиллар ўткинчи ит сабабли бир-бирига урилган. Оқ рангдаги Ferrari 488 тормозланишга уринган, аммо кулранг Ferrari 488 тўхташга улгурмаган. Натижада автомобиллар тўқнашиб кетган.

Ҳодиса кутилмаганда тус олган бўлса-да, кўчадан ўтаётган ит омон қолган. Аммо эндиликда автомобилларни таъмирлаш учун унинг соҳиблари жуда катта миқдордаги маблағ сарфлашади.

Carnewschina.com нашрининг ёзишича, ҳар бир  Ferrari 488 модели 626 минг доллар эвазига сотиб олинган. Моделга 3,9 литрли, 661 от кучига эга мотор ўрнатилган. Максимум тезлиги -330 км/ст.

Афтидан, Ferrari ҳайдовчилари пойга ўйнаётган бўлишган. Буни расмлардаги тўқнашув оқибатларига кўра англаш мумкин. Автомобилларнинг олд ва орқа қисми жиддий зарарланган. Бундай ҳолат фақат катта тезликда ҳаракатланганда кузатилиши мумкин.