Хитойликлар нусха кўчирган Ford Explorer ва яна етти қимматбаҳо модел

Чэнду ва Шанхайдаги автосалонлар 2015 йилда хитой авто ишлаб чиқарувчилари нусха кўчиришни тўхтатиш ниятида эмаслигини кўрсатди. Қайсидир компания ўз услубини излаётган вақтда бошқалари андишасизларча нусха кўчирмоқда. Норозилик ва қаршиликлар бўлаётганига қарамасдан, нусхалар ҳеч қандай ўзгаришларсиз серияли тарзда ишлаб чиқарилмоқда.

Хитойнинг учинчи йирик автоишлаб чиқарувчиси навбатдаги нусха моделини намойиш этди. Ташқи томондан CX70 кроссовери янги Ford Explorer моделини деярли такрорлайди. Хитой автомобили Форддан ҳажм ва мотор қуввати билангина ажралиб туриши мумкин. Албатта, СХ70 форд моделидан кўра сезиларли даражада арзон.

Hongqi LS5 SUV – Range Rover Vogue

Hongqi LS5 йўлтанламасларини ишлаб чиқараётган FAW давлат корпорацияси Range Rover`нинг янги авлод моделларидан тўлақонли илҳом олган кўринади. “Хунцзи” бренди Хитой партиясининг олиймақом вакиллари учун мўлжалланган, икки дона L5 кабриолети эса Белорусь Мудофаа вазирлиги томонидан парадларда фойдаланилмоқда.

Йўлтанламас ички дизайни буткул эскича услубда ишлаб чиқилган бўлиб, фақатгина марказ бўйлаб жойлашган олд ускуналар панели виртул кўрсаткичларга эга. LS5 концепти 2015 йили Шанхайдаги автосалонда намойиш қилинган эди. Сентябрь ойида эса энг қиммат Хитой йўлтанламаси серияли тарзда ишлаб чиқарила бошланди. Унинг капоти остида ҳажми 4,0 литрли V8 турбомотори жойлашган. Двигатель қуввати 381 от кучини ташкил этади ва 100 километр соат тезликка эришиш учун 8,1 сония талаб қилади.

Landwind X7 – Range Rover Evoque

Jaguar Land Rover корпорацияси норозилигига қарамасдан, Хитойнинг Landwind Motors компанияси Х7 кроссовери — Range Rover Evoque`нинг ноқонуний нусхасини серияли тарзда ишлаб чиқармоқда. Британиялик асл нусхадаги каби Х7 ҳам 2,0 литрли турбомотор билан таъминланган. Бироқ хитойларнинг қувват агрегати кўплаб хусусиятларига кўра ундан ортда қолади: 240 от кучи ва 340 ньютон-метр ўрнига 190 от кучи ва 250 Нм ни ташкил этади. Нусха 8 босқичли “автомат каробка” билан таъминланган. Хавфсизлик ёстиқчалари сони эса фақатгина иккита. Бироқ Х7 Хитойда “Эвок”ка қараганда уч баробар арзонроқ: унинг нархи 135 минг юандан бошланади, бу пайтда асл маҳсулот ишқибозлари Range Rover йўлтанламаси учун 448 минг юан тўлашлари лозим.

JAC Refine A6 – Audi A6

Refine A6 седани нафақат Audi A6га ташқи томондан айнан ўхшаш, балки уларнинг номлари ҳам қарийб бир хил. Хитой нусхасининг оригиналига қараганда бир оз калтароқ, энсизроқ ва баландроқ. Ички дизайни эса Audi A6 ва кейинги авлод Audi моделлари интерьери аралашмасидан ташкил топган.

Хитой “Ауди”си ҳам турбомотор билан таъминланган, бироқ кучсизроқ: 1,5 литрли 174 от кучи (251 Нм)га эга “тўртталик” ёки 2,0 литр ҳажмли 190 от кучи (280 ньютон-метр)га тенг қувват агрегаторлари билан қуроллантирилган. Refine A6`нинг дастлабки намунаси апрел ойида Шанхайда бўлиб ўтган автосалонда намойиш этилган эди. Кенг кўламда ишлаб чиқариш эса 2015 йилнинг декабрь ойига мўлжалланган. Унинг тахминий нархи энг камида 240 минг юан атрофида бўлиши айтилмоқда.

Beijing BJ90 – Mercedes-Benz GL

BAW компаниясининг янги йўлтанламаси ҳам «тасодифан» мерседес моделига ўхшаб қолган кўринади. Бироқ уни тўлақонли нусха деб бўлмайди. Унинг ташқи кўриниши хитойликларнинг дидига биноан ўзгартирилган: радиатор панжараси Jeep услубида тайёрланган бўлса, ёриткичлар кўриниши Range Rover`дан олинган.

Daimler концерни BAW`ни ҳам ўз таркибига олган BAIC холдинги акционерларидан ҳисобланади. Хитойда унинг ҳамкорликдаги корхоналари фаолият юритмоқда. Шу боис германиялик шерик Хитой компаниясига нафақат ўз моделларидан фойдаланиш ҳуқуқини берган, балки айрим технологиялари билан ҳам бўлишган. ChinaCarTimes маълумотига кўра, йўлтанламас қуввати 333 от кучига тенг V6 ва 421 от кучига эга V8 турбомоторлари, шунингдек, етти босқичли “автомат”га эга бўлади.

Beijing BJ80 – Mercedes-Benz G-Class

Бошқа Мерседес йўлтанламасларидан фарқли ўлароқ, BAW афсонавий “Гелендваген”дан ҳеч қандай сўроқсиз нусха кўчирди. Германиялик шеригининг норозилигига қарамасдан, уни йил охирига қадар серияли ишлаб чиқаришга киришган. BJ80 икки хил кўринишда ишлаб чиқарилади: фуқаролар ва ҳарбийлар учун. Армия учун мўлжалланган намуна қаттиқ томдан ташқари, юмшоқ ва йиғиладиган уст қисмига ҳам эга бўлади.

Асосий қувват агрегатори сифатида лицензияга эга 2,8 литрли Cummins турбодизелидан фойдаланилади. Унинг қуввати 160 от кучига тенг. Фуқаролар учун мўлжалланган автомобиль эса 250 от кучига эга 2,3 литрли бензинли “турботўртталик” билан таъминланади.

Zotye Damai X5 – VW Tiguan

Хитойнинг унча катта бўлмаган Zotye компанияси Volkswagen концернининг дизайнерлик тилини фаоллик билан ўзлаштирмоқда. Унинг 2013 йилда намойиш этилган Т600 кроссовери VW Touareg`га ўхшаган бўлса, навбатдаги Damai X5 короссовери Tiguan моделига айнан ўхшаш. Бироқ хитой кроссоверлари асл нусхасига қараганда бир оз кичикроқ.

Т600 ва Х5 – қарийб бир хил ҳажмдаги автомобиллардир. Х5 ички дизайнида олд панел мураккаб шаклга эга бўлиб, ускуналари эса Chevrolet Camaro услубида жойлаштирилган. Ҳар икки модел ҳам 1,5 литрли, 150 от кучига эга турбомотор билан таъминланган бўлиб, улар 5 босқичли “механика” билан мос равишда ишлайди. Уларнинг нархи ҳам бир хил – 79800 юандан бошланади.

Х5 радиатор панжаралари учун бир қанча вариантлар, жумладан, Range Rover услубидан ҳам фойдаланилган.

Zotye S21 – Audi Q3

Zotye компанияси VW ва Porsche`дан ташқари Audi дизайнидан ҳам фаол нусха олмоқда. Чэндудаги автосалонда компания Audi Q3 моделига жуда ўхшаш S21 кроссоверини намойиш этди. Бироқ унинг асл радиатор панжарасини такрорламаслик мақсадида хитойлар Volkswagen услубидан фойдаланишди. Автомобиль ички интерьерини тайёрлашда Zotye мутахассислари немис мотивларидан илҳом олишди. Мультимедия тизими экрани эса Tesla Model S ва Volvo XC90 моделлариникидан ҳам каттароқ. S21 компаниянинг энг йирик моделларидан бири бўлиб, у Т600 ва Т700 моделлари ўртасидан жой олади. Шу билан бирга, Хитой ОАВ маълумотларига кўра, кроссоверга ҳам 1,5 литр ҳажмли турбомотор ўрнатилади.