Яна бир ҳамёнбоп автомобиль — Lada Prioraни кутинг

АвтоВАЗ компанияси 2016 йил февралидан таниқли Lada Priora моделини қайта ишлаб чиқаришни бошламоқчи.

АвтоВАЗ вакиллари сўзларига кўра, Lada Priora ишлаб чиқариш келгуси 1,5-2 йил ичида давом этади. Ўта ҳамёнбоп деб таъриф берилаётган моделга ВАЗ-21186 мотори ўрнатилади, двигатель ҳажми 1,6 литр ва 87 от кучи бор. Қолаверса, такомиллаштирилган агрегат Евро-5 талабига жавоб беради. Айни вақтда автомобилга ўрнатилаётган мотор 106 от кучига эга.

Шу билан бирга Lada Priora русумига хавфсизлик ёстиқчаси, руль электрокучайтиргичи ва амалдаги қонунга кўра ABS антиблоклаш тизими ўрнатилади. Ички қопламалари ҳам арзон мато ва пластиклардан ишланади. Кондиционер олиб ташланади. Буларнинг барчаси модель баҳосини 5 минг евродан пасайтириш имконини яратади. Модель Россия автобозоридаги энг ҳаммабоп автомобиллар ўнлигига кириши кутилмоқда.

Lada автомобилларига Тошкентдаги Lada автосалони орқали буюртма бериш мумкин.

Эслатиб ўтамиз, Priora седанини ишлаб чиқариш 2007 йилдан, хэтчбек модели эса 2008 йилдан бошланган. 2009 ва 2012 йилларда Lada Priora Россияда энг бозори чаққон автомобиль сифатида тан олинган. 2015 йил май ойига келиб конвейердан чиққан Priora сони 900 мингга етган.