Янги Лада Веста SW универсалини сотиб олишингиз учун ўн сабаб

Харидорлар Лада Веста SW универсалини савдодан топиб бўлмаётганлиги ва навбат кўплигидан шикоят қилмоқда. Ҳали тўла қувват билан ишлаб чиқарила бошланмаган универсалга қизиқиш ошиб кетди. Ҳа, Веста SW “Лада” оиласининг донғини таратган русумлардан чиқиб қолди.

Бу кўркам универсални харид қилишингиз учун ўн сабабни келтирамиз.

Нархи. Веста SWнинг нархи анчагина арзон. Lada.uz сайтида 70 млн сўм нарх кўрсатилган.

Бу автомобилда АБС, барқарорлаштириш тизими, иккита хавфсизлик ёстиқчаси, тўртта электрли ойнакўтаргич, олд ўриндиқлар иситкичи, ташқи ойналар иситкичи, руль колонкасини баландлик ва йўналиш бўйича ростлагичи, парковкалаш датчиги, марказий қулфни масофадан бошқариш, яккатезлик назорати ва тўрт динамикли аудиотизими бор. Бундай қулайликларга эга бошқа автомобиллар қимматроқ туришини эслатиб ўтамиз.

Дизайни. Унинг қия томи, виқорли қиёфасига ҳавас қиласан киши. Тажовузкор дизайнни истаганлар “кросс” версиясига харидор бўлиши мумкин. Кимга юк-йўловчи ташувчи русум керак бўлса, “Ларгус” унга мунтазир.

Содда ва қулай салони. SWнинг салони седанникига ўхшаш, ҳаттоки ундан яхшироқ. Олд қисми деярли ўзгаришсиз қолган. Созламалар ўз жойида. Олд тирсакқўйгичда қутича пайдо бўлган. Орқасида эса бўйи 180 смдан ортиқ одам ҳам қисилмай ўтириши мумкин. Олд ўриндиқларнинг орқа қисми сунъий чармдан ишланган.

Шарт-шароитлари. “Веста”нинг универсали седани билан максимал ўхшатилган. Юкхонасига ҳажми эмас, жойлаштириш тақсимоти билан қойил қоласиз. Халталар учун илгак, махсус ҳамён, икки тарафлама ёритқичлар, 12 Волтли розетка, полнинг иккинчи қаватини ташкил қилувчи қопқоқлардан шошиб қоласиз. Орқа ўриндиғи седанники каби олд тарафга тахланади. Натижада орқада кенг-мўл ётоқжой ҳосил бўлади.

Бошқариш қулайлиги. Кўп таърифини келтирмасдан рулининг аниқ ишлаши, барқарорлиги ва ишончлилигини айтиш билан чекланамиз.

Йўлсиз шароитда ўзини йўқотмаслиги. Туби ердан анча баландлиги боис (178 см) ўйдим-чуқурлар писанд эмас. Йўлсиз шароитда тезликни пасайтирмасангиз ҳам бўлади.

Акустикаси. Инженерлар салондаги товуш тарқалиши бўйича жиддий ишлаган. Веста SW бу борада корейс, немис ва чех машиналаридан қолишмайди.

Фаол ва пассив хавфсизлик. Универсалнинг рули ва ғилдираклари итоаткор, тормозланиш ва бошқа турдаги синовлардан яхши ўтган. Пассив хавфсизлигига келсак, синов мобайнида тўрт юлдузчадан тўрттасини олган. Бу жиҳатдан “Поло” ва “Солярис” билан салкам бир хил натижа кўрсатган.

Таъмирлаш харажати. “Веста” оиласи автомобиллари шундай ясалганки, махсус эзилувчи элементлар зарбани қабул қилади. Натижада улар алмаштирилади, капот, қанотлар, фара ва бампер ўзгаради. Бундан ташқари техник қисмининг таъмири ҳам чўнтакка азият етказмайди.

Олиб қочиш имкони йўқлиги. Бу ҳам барчани қизиқтирадиган хусусият. Чунки ортиқча ташвишнинг олдини олибгина қолмасдан, суғурта баҳосига ҳам таъсир қилади.