Янги Mercedes-Benz GLA: илк тафсилотлар

Янги авлод кроссоверининг дебюти 2019 йилга режалаштирилган. Бироқ янгиланган Mercedes-Benz GLA автомобили ҳақида илк тафсилотлар немис журналистлари томонидан маълум қилинди.

Auto Bild нашрининг хабар тарқатишича, янги Mercedes-Benz GLA ўтмишдошига қараганда ҳажман катта ва янада динамик дизайнга эга бўлади. Шуниндек, купесимон версияни ишлаб чиқариш (GLA Coupe) ҳам режалаштирилган.

Янги авлод Mercedes-Benz GLA моделида олд узатмали платформа сақлаб қолинади, бироқ у модернизация қилиниши эҳтимолга яқин. Масалан, моделнинг орқа подвескаси такомиллаштирилади ва унга янги адаптив амортизаторлар ўрнатилади. Бундан ташқари, кроссовер 9 поғонали иккита уловчи механизмга эга трансмиссия билан таклиф этилади.

Двигателларга келсак, янги авлод Mercedes-Benz GLA бензин ва дизелда ҳаракатланадиган 122 тадан 408 тагача от кучида бўлган моторлар билан таъминланади. Шу билан бирга гибрид ва тўлиқ электрли моторга эга версияларни  ишлаб чиқариш режалаштирилган. Баъзи маълумотларга қараганда, ушбу кроссовер Tesla Model 3 билан рақобат қилиши ва бир марта зарядланиш орқали 400 км масофа босиши мумкин бўлади.