Японияда Mazda MX-5 йил автомобили бўлди

Кунчиқар юртда овоз бериш йўли билан йилнинг энг яхши автомобили танланди. Энг кўп овозни Mazda MX-5 автомобили олди. Унга 442 иштирокчи овоз берган.

Иккинчи ўринга Honda S660 русуми лойиқ топилган бўлиб, Маздадан 41 овоз кам олган. Немисларнинг BMW 2-Series модели 177 овоз билан учинчи ўринни эгаллади.

Mazdaнинг режалаштириш бўйича вице-президенти Киеси Фудзивара “Биз қийин дамларни, жумладан, молиявий инқироз ва 2011 йилдаги зилзилани бошимиздан кечирдик. Аммо асосий тамойилларимизга содиқ қолиб муваффақият формуласини яратдик”, деб айтди. У MX-5 лойиҳаси билан шуғулланаётган жамоага ҳам миннатдорчилик билдирди.

Бундан ташқари тадбирда қўшимча мукофот ҳам таъсис этилган. Suzuki Alto йилнинг энг ихчам автомобили, Tesla Model S инновацион автомобиль йўналишларида ғолиб деб топилди. Toyota Mirai водородмобили эса водород ёнилғисига ўтишни жадаллаштираётганлиги учун танлов эътирофига сазовор бўлди.