Zagato ва Aston Martin’дан янги родстер

Италиянинг Zagato тюнинг-ательеси Aston Martin билан ҳамкорликда Vanquish Zagato Volante номли янги родстерни яратди. Автомобилнинг тақдимоти Пебл-Бич кўргазмасида бўлиб ўтди. Ушбу модель фақат АҚШ автомобиль бозори учун 99 та нусхада ишлаб чиқарилади.

Автомобилнинг кузови карбондан тайёрланган. Салон юзаси қисман карбон, анодланган бронза ва чармли элементлар билан қопланган.

Родстерга 5,9 литрли бензинда ҳаракатланадиган V12 двигатели ўрнатилган. Агрегат 592 та от кучига эга. Автомобиль 3,7 секундда 100 км/соат тезликка эриша олади. Родстер Уоркшир (Британия) графлигидаги Гейдон шаҳрида жойлашган Aston Martin штаб-квартирасида лойиҳалаштирилган.

Шу йилнинг май ойида Zagato ва Aston Martin Vanquish Zagato купесини тақдим қилишган эди.

Купе дизайни устида Марек Райхман (Aston Martin) ва Андреа Загато (Zagato) иш олиб боришган. Купенинг кузови ҳам тўлиқ карбондан тайёрланган. Машина қора рангли марказий стойка, ҳаракатланувчи спойлер, One-77 услубидаги ён кўзгулар ва 4 патрубкали газ чиқариш тизими билан таъминланган.

Zagato ательеси дизайн бўйича Aston Martin билан ишлаётган биринчи компания эмас. Олдинроқ Bertone ательеси ҳам Женева автошоуси учун махсус  Aston Martin Rapide моделини яратган эди. Автомобиль универсал кузов типида ишлаб чиқилиб, унга Jet 2+2 номи берилганди.

Бундан ташқари, 2004 йилда қайта ишланган Vanquish’ни эслатувчи, фақат битта нусхада тайёрланган Jet 2 концепти ҳам намойиш қилинган эди.