Teslaга янги рақобатчи дунёга келади

2013 йилда автомобилсозлик фирмаси касодга учраган Хенрик Фискер электромобиль ишлаб чиқарувчи янги компания ташкил этишини ва Тесла билан рақобатга киришишини айтди.

Фискер Калифорнияда бунёд этиладиган Fisker Inc номли янги корхонасининг молиячиси ҳақида оғиз очмади. Батарея ва электромотор билан Fisker Nanotech номли шўъба корхонаси шуғулланади.

2007 йилда очилган Fisker Automotive компанияси фаолияти давомида ишлаб чиқарган автомобилларнинг сони икки мингтага бормайди. Фискернинг касодга учраган компаниясини Хитойнинг Wanxiang Group корпорацияси сотиб олиб, Karma Automotive дея қайта номлаган.

Аммо Фискернинг янги компанияси Wanxiang билан алоқадор эмас.

Бўлажак электромобиль тўғрисида биргина тизердан бўлак нарса йўқ. Расмдан спорт купе ишлаб чиқарилиши ва у хийла дадил дизайнда бўлишини илғаш қийин эмас. Капоти тор ва салони кенг бўлади.  Тўла заряди билан 400 мил (644 км) йўл босиши мумкин.